کراچی۔ پاکستانی شوبز انڈسٹری کی خوبصورت اور باصلاحیت اداکارہ سارہ خان نے ٹی وی اسکرین پر ڈانس نہ کرنے کی وجہ بیان کر دی ہے۔ سارہ خان نے کئی ہٹ ڈراموں میں اپنی زبردست اداکاری کے جوہر دکھائے ہیں، اور ان کے ڈرامے نہ صرف پاکستان بلکہ بھارت اور بنگلادیش میں بھی بے حد مقبول ہیں۔ جہاں مداح سارہ خان کی اداکاری کے دیوانے ہیں، وہیں ان کے معصوم چہرے اور خوبصورت مسکراہٹ بھی مداحوں کو بہت پسند ہے۔ اداکارہ اکثر سوشل میڈیا پر اپنی تصاویر پوسٹ کرتی ہیں جنہیں مداحوں کی جانب سے خوب سراہا جاتا ہے۔ حال ہی میں سوشل میڈیا پر سارہ خان کے ایک انٹرویو کا مختصر ویڈیو کلپ وائرل ہو رہا ہے، جس میں وہ ٹی وی اسکرین پر ڈانس نہ کرنے کے حوالے سے بات کرتی نظر آ رہی ہیں۔ سارہ خان نے کہا کہ وہ ٹی وی اسکرین یا کسی ایوارڈ شو میں ڈانس نہیں کرتی، اور مداحوں نے انہیں کبھی بھی ڈانس کرتے ہوئے نہیں دیکھا۔ اداکارہ نے مزید کہا کہ ان کے مداح انہیں بہت پسند کرتے ہیں، اور وہ ان کے ڈراموں، کرداروں اور ملبوسات کی وجہ سے ان سے محبت کرتے ہیں۔ سارہ خان نے کہا کہ وہ اپنے مداحوں کی پسند و ناپسند کا خیال رکھتی ہیں، اور کبھی ایسا کوئی کام نہیں کرنا چاہتی جس سے ان کے مداح مایوس ہوں یا ان کو تکلیف ہو۔ انہوں نے کہا کہ یہی وجہ ہے کہ انہوں نے کبھی ٹی وی اسکرین پر ڈانس نہیں کیا، اور انہیں امید ہے کہ مستقبل میں بھی وہ اسکرین پر ڈانس نہیں کریں گی۔
