اگرچہ ماضی میں جینے کو بعض افراد ناپسند کرتے ہیں، مگر ایک تازہ سائنسی تحقیق سے یہ بات سامنے آئی ہے کہ جو لوگ ماضی کی یادوں سے جُڑے رہتے ہیں، وہ نہ صرف قریبی اور پائیدار دوستیوں کے حامل ہوتے ہیں بلکہ ان کی جسمانی اور ذہنی صحت بھی نسبتاً بہتر ہوتی ہے۔
جرنل کگنیشن اینڈ ایموشن میں شائع شدہ اس مطالعے میں ماہرین کا کہنا ہے کہ ماضی کی حسین یادوں سے جڑے افراد نہ صرف مضبوط سماجی تعلقات قائم کرتے ہیں بلکہ ان روابط کو دیرپا بنانے میں بھی دوسروں کے مقابلے میں زیادہ کامیاب ہوتے ہیں۔
تحقیق کی قیادت کرنے والے ماہر، کوان جو ہوانگ نے ایک بیان میں وضاحت کی کہ جو لوگ ماضی کی خوشگوار یادوں کو دل سے اپناتے ہیں، وہ اپنے اہم تعلقات کو گہرائی سے محسوس کرتے ہیں اور ان کو سنوارنے کی بھرپور کوشش کرتے ہیں۔
ہوانگ کے مطابق، ایسی وابستگی کا نتیجہ یہ ہوتا ہے کہ ان افراد کی دوستیاں وقت کے ساتھ بھی قائم رہتی ہیں، چاہے عمر بڑھ جائے، ترجیحات بدلیں یا زندگی کی ذمے داریاں بڑھ جائیں۔
محققین نے مزید واضح کیا کہ مثبت سماجی رشتے نہ صرف فلاح و بہبود میں کلیدی کردار ادا کرتے ہیں بلکہ بڑھتی عمر میں ذہنی سکون، یادداشت اور علمی صلاحیتوں کو بھی بہتر بناتے ہیں۔
