ایک نئی رپورٹ کے مطابق، ٹیکنالوجی کمپنی ایپل ایک مصنوعی ذہانت پر مبنی ڈاکٹر تیار کرنے کی منصوبہ بندی کر رہی ہے، جو آپ کے فون میں موجود ہوگا۔
بلومبرگ کی رپورٹ کے مطابق، اس منصوبے کا نام پروجیکٹ ملبیری ہے، جس کا مقصد ایک ایسا اے آئی ایجنٹ تیار کرنا ہے جو حقیقی ڈاکٹر کی طرح کام کر سکے۔
رپورٹ کے مطابق، اس نظام کو حقیقی ڈاکٹروں سے تربیت دی جا رہی ہے تاکہ یہ مصنوعی ذہانت کا استعمال کرتے ہوئے ڈاکٹروں کی طرح مشورے دے سکے۔ یہ نظام آئی فون کی ہیلتھ ایپ میں ایک بڑی تبدیلی کے طور پر پیش کیا جائے گا، جس میں ممکنہ طور پر ہیلتھ + کے نام سے جانی جانے والی سبسکرپشن سروس بھی شامل ہو سکتی ہے۔
ایپل نے پہلے ہی اپنے دیگر نظاموں میں مصنوعی ذہانت کو ضم کیا ہے، تاہم یہ منصوبہ حالیہ دنوں میں کچھ مشکلات کا شکار ہو چکا ہے۔
دوسری جانب، دیگر صحت کے پلیٹ فارمز بھی علامات کی شناخت کے لیے مصنوعی ذہانت کا استعمال کر رہے ہیں، جیسے گارمین نے حال ہی میں ایک نئی آرٹیفیشل انٹیلیجنس سبسکرپشن سروس شروع کی، جس پر بعض صارفین نے ناپسندیدگی کا اظہار کیا۔ یہ سروس بھی صارفین کو مشورے فراہم کرتی ہے۔
