اسپیس ایکس نے اپنے اسٹارلنک انٹرنیٹ سیٹلائٹ منصوبے کے تحت ایک اور نمایاں مشن مکمل کرلیا ہے، جس میں فلوریڈا سے درجنوں سیٹلائٹس مدار میں بھیجے گئے۔
اتوار، 6 اپریل کو کیپ کیناویرل اسپیس فورس اسٹیشن سے فالکن 9 راکٹ نے کامیابی کے ساتھ اڑان بھری، جس میں 28 اسٹارلنک سیٹلائٹس سوار تھیں۔
کمپنی کے جاری کردہ بیان کے مطابق، پرواز کے تقریباً آٹھ منٹ بعد راکٹ کا پہلا مرحلہ دوبارہ زمین پر لوٹ آیا اور اسپیس ایکس کی خودکار ڈرون شپ پر کامیابی سے لینڈ کر گیا۔
اسپیس ایکس نے سوشل میڈیا پلیٹ فارم ایکس پر اطلاع دی کہ فالکن 9 کے اوپری حصے نے روانگی کے تقریباً ایک گھنٹے بعد سیٹلائٹس کو زمین کے نچلے مدار (Low Earth Orbit) میں چھوڑ دیا، جیسا کہ منصوبہ بندی کی گئی تھی۔
یہ مشن رواں سال یعنی 2025 میں فالکن 9 راکٹ کی 39ویں پرواز ہے۔ ان میں سے بیشتر پروازیں اسٹارلنک نیٹ ورک کی وسعت کے لیے مخصوص کی گئی ہیں، جو اس وقت دنیا کا سب سے وسیع سیٹلائٹ سسٹم بن چکا ہے۔
