پاکستان سپر لیگ (پی ایس ایل) کے شائقین کے لیے ایک خوشی کی خبر سامنے آئی ہے کہ ایچ بی ایل پی ایس ایل سیزن 10 کے آفیشل اینتھم کا ٹیزر جاری کر دیا گیا ہے۔ کرکٹ کے چاہنے والوں کا انتظار اب اپنے اختتام کو پہنچنے والا ہے کیونکہ پاکستان کا سب سے بڑا کرکٹ ایونٹ جلد شروع ہونے جا رہا ہے۔
پاکستان کرکٹ بورڈ (پی سی بی) نے پی ایس ایل 10 کے اینتھم کا آفیشل ٹیزر پیش کیا ہے جس میں ملک کے مشہور گلوکار اپنی آواز کا جادو چلائیں گے۔
اس اینتھم میں معروف گلوکار علی ظفر ایک بار پھر اپنی شاندار آواز کا جادو دکھائیں گے، جبکہ ان کے ساتھ ابرار الحق، ابھرتی ہوئی گلوکارہ نتاشہ بیگ اور نوجوان ریپر طلحہ انجم بھی اپنے گانے سے شائقین کو محظوظ کریں گے۔
پی سی بی نے یہ بھی بتایا کہ پی ایس ایل 10 کا مکمل اینتھم جلد ریلیز کیا جائے گا، جس کا کرکٹ کے شائقین شدت سے انتظار کر رہے ہیں۔
یاد رہے کہ ایچ بی ایل پی ایس ایل سیزن 10 کا آغاز 11 اپریل سے ہونے جا رہا ہے، جس میں پاکستان اور دنیا بھر کے کرکٹ کے عظیم کھلاڑی اپنی مہارت کا مظاہرہ کریں گے۔
