اسلام آباد ۔بشریٰ بی بی نے 190 ملین پاؤنڈز کیس میں اپنی سزا معطلی کی درخواست پر فوری سماعت کی استدعا کر دی۔
پی ٹی آئی کے بانی چیئرمین عمران خان کی اہلیہ بشریٰ بی بی نے اسلام آباد ہائی کورٹ میں درخواست دائر کی ہے، جس میں سزا معطلی کی درخواست پر جلد سماعت کی گزارش کی گئی ہے۔
درخواست میں مؤقف اپنایا گیا ہے کہ 25 مارچ کو کیس سماعت کے لیے مقرر تھا، تاہم مرکزی وکیل سپریم کورٹ میں ایک قتل کے مقدمے میں مصروف تھے۔ عدالت نے مختصر کاز لسٹ کے باعث سزا معطلی کی درخواستوں کو عید کے بعد تک ملتوی کر دیا۔
بشریٰ بی بی نے درخواست میں مزید مؤقف اختیار کیا کہ وہ 54 سالہ گھریلو خاتون ہیں، اور ان کی سزا معطلی کی درخواست کو مرکزی اپیل کے ساتھ عید سے قبل سماعت کے لیے مقرر کیا جائے۔یاد رہے کہ درخواست میں وفاق اور چیئرمین نیب کو فریق بنایا گیا ہے۔
