پشاور۔ایوان بالا (سینیٹ) میں اپوزیشن لیڈر اور پاکستان تحریک انصاف کے سینئر رہنما سینیٹر شبلی فراز نے کہا ہے کہ ہمارا اتحاد اپوزیشن کے ساتھ ہے اور اگلے کچھ دنوں میں ہمارے معاملات طے ہو جائیں گے۔ عید کے بعد سب مل کر حکومت کے خلاف نکلیں گے۔
پشاور میں عدالت کے باہر میڈیا سے گفتگو کرتے ہوئے سینیٹر شبلی فراز نے کہا کہ یہ ایک سال پاکستان کی تاریخ کا سیاہ ترین دور ہے۔ انہوں نے کہا کہ پیکا اور 26ویں ترمیم سمیت دیگر قوانین جموکری نہیں بلکہ طاقت کے ذریعے پاس کیے گئے ہیں، اس دوران حکومت نے کام کچھ نہیں کیا اور صرف اشتہارات میں اربوں روپے خرچ کیے۔
شبلی فراز نے مزید کہا کہ وفاقی کابینہ میں اضافہ ضمیر فروشوں کے لیے انعام ہے، کچھ لوٹے اور کچھ بگوڑے اس میں شامل ہیں۔ انہوں نے کہا کہ ملک قرضوں میں ڈوب چکا ہے اور مہنگائی میں بے پناہ اضافہ ہو چکا ہے۔
ان کا کہنا تھا کہ خیبر پختونخوا اور بلوچستان میں دہشت گردی کی لہر جاری ہے، جبکہ سندھ کے لوگ اپنے پانی کے جائز مطالبات کے لیے اٹھ کھڑے ہوئے ہیں۔ انہوں نے پھر کہا کہ ہمارا اتحاد اپوزیشن کے ساتھ ہے اور اگلے چند روز میں ان کے ساتھ ہمارے معاملات طے ہو جائیں گے۔
شبلی فراز نے عید کے بعد سب مل کر حکومت کے خلاف احتجاج کرنے کی بات کی اور کہا کہ خیبر پختونخوا میں بنوں تک دہشت گردوں کا پہنچنا تشویشناک ہے۔ انہوں نے مزید کہا کہ علی امین گنڈا پور حالات کو کنٹرول کرنے کی کوشش کر رہے ہیں، لیکن بیک ڈور رابطے کبھی بحال ہوتے ہیں کبھی نہیں۔ عید کے بعد احتجاج کی تیاری کی جارہی ہے۔
