دبئی ۔آئی سی سی چیمپئنز ٹرافی کے آخری گروپ میچ میں بھارت نے نیوزی لینڈ کو 44 رنز سے شکست دے کر ایک اور کامیابی اپنے نام کرلی۔
بھارت نے پہلے بیٹنگ کرتے ہوئے نیوزی لینڈ کو 250 رنز کا ہدف دیا، جس کا پیچھا کرتے ہوئے نیوزی لینڈ کی پوری ٹیم 45.3 اوورز میں 205 رنز بنا کر آؤٹ ہوگئی۔
اس سے قبل بھارت کی بیٹنگ کا آغاز مایوس کن رہا اور ابتدائی تین کھلاڑی 30 رنز کے مجموعی اسکور پر پویلین واپس لوٹ گئے۔ شبمن گل 2، روہت شرما 15 اور ویرات کوہلی 11 رنز بنا کر آؤٹ ہوئے۔
چوتھی وکٹ پر اکشر پٹیل اور شیریاس ایئر کے درمیان 98 رنز کی شراکت قائم ہوئی، تاہم اکشر پٹیل 42 رنز بنا کر آؤٹ ہوگئے، جب کہ شیریاس ایئر 79 رنز بنا کر پویلین لوٹ گئے۔ کے ایل راہول 23 رنز بنا کر آؤٹ ہوئے۔
ان کے بعد ہاردک پانڈیا نے 45، رویندرا جدیجا 16، محمد شامی 5 اور کلدیپ یادیو ایک رن بنا کر آؤٹ ہوئے۔ اس طرح بھارت نے 50 اوورز میں 9 وکٹوں کے نقصان پر 249 رنز بنائے اور نیوزی لینڈ کو جیت کے لیے 250 رنز کا ہدف دیا۔
نیوزی لینڈ کی جانب سے میٹ ہنری نے 5 وکٹیں حاصل کیں، جب کہ کائل جیمیسن، راچن رویندرا، ول اوورک اور مچل سینٹنر نے ایک ایک وکٹ لی۔
نیوزی لینڈ کی بیٹنگ کا آغاز بھارت کے 250 رنز کے ہدف کے تعاقب میں کچھ خاص نہ رہا۔ 17 کے مجموعی اسکور پر رویندرا 6 رنز بنا کر آؤٹ ہوگئے، پھر ول یانگ 22 رنز بنا کر ورون کی گیند پر بولڈ ہوئے، اس طرح نیوزی لینڈ کو 49 کے اسکور پر دوسرا نقصان اٹھانا پڑا۔
اس کے بعد مچل 93 کے مجموعی اسکور پر 17 رنز بنا کر آؤٹ ہوئے اور ٹام لاتھم 133 کے اسکور پر 14 رنز بنا کر پویلین لوٹ گئے۔
پانچویں آؤٹ ہونے والے کھلاڑی گلین فلپس تھے، جو 133 کے مجموعی اسکور پر 12 کے انفرادی اسکور پر پویلین واپس لوٹ گئے۔ پھر مچل بریس ویل 2 رنز بنا کر آؤٹ ہوئے۔
کین ولیمسن 81 رنز کی عمدہ اننگز کھیل کر پٹیل کا شکار بنے اور 169 کے اسکور پر پویلین لوٹ گئے، پھر 195 پر مچل اسٹینر بھی آؤٹ ہوگئے۔
آخرکار ہینری اور ول اوورک بالترتیب 196 اور 205 کے مجموعی اسکور پر آؤٹ ہوئے۔ ولیمسن 81 رنز کے ساتھ سب سے زیادہ اسکور کرنے والے کھلاڑی رہے، جبکہ 5 نیوزی لینڈ کے کھلاڑی ڈبل فگر میں بھی نہیں پہنچ سکے۔
