آئی سی سی چیمپئنز ٹرافی میں قومی ٹیم کی بدترین پرفارمنس کے بعد نیوزی لینڈ کے خلاف سیریز میں نوجوان کرکٹرز کو موقع دینے کا فیصلہ کیا گیا ہے۔
میڈیا رپورٹس کے مطابق، دورہ نیوزی لینڈ کے سلسلے میں ڈومیسٹک کرکٹ کے بہترین پرفارمرز کو لاہور طلب کر لیا گیا ہے، اور نوجوان کرکٹرز کی اعلیٰ بورڈ عہدیداروں سے جلد ملاقات بھی متوقع ہے۔
قومی ٹیم نے 12 مارچ کو نیوزی لینڈ روانہ ہونا ہے، جہاں پہلے مرحلے میں 5 میچز کی سیریز 16 مارچ سے شروع ہوگی۔ بعدازاں 3 ون ڈے میچز بھی کھیلے جائیں گے۔
ذرائع کا کہنا ہے کہ ٹی20 ورلڈکپ 2026 کی تیاری کے سلسلے میں نوجوان کرکٹرز پر انحصار کا فیصلہ کیا گیا ہے، تاکہ وہ مستقبل میں ٹیم کے لیے اہم کردار ادا کر سکیں۔
ادھر، ناقص پرفارمنس کے باعث گزشتہ روز خبریں سامنے آئیں تھیں کہ بابراعظم، حارث رؤف، نسیم شاہ اور شاہین شاہ آفریدی کو آرام دیا جائے گا، اور ان کرکٹرز نے خود بھی مشاورت شروع کردی ہے تاکہ اپنی کارکردگی کو بہتر بنایا جا سکے۔
