ماسکو: روسی ماہی گیر نے گہرے سمندر سے ایک غیر معمولی شکل و صورت کی مچھلی پکڑ لی، جس کی حیران کن ساخت نے انٹرنیٹ صارفین کو دنگ کر دیا۔ وائرل ویڈیو دیکھ کر لوگ اسے خلائی مخلوق قرار دے رہے ہیں۔
ماہی گیر رومن فیڈورٹسوو، جو منفرد سمندری مخلوقات کی تصاویر اور ویڈیوز شیئر کرنے کے لیے مشہور ہیں، نے حالیہ دریافت میں لمپ سکر نامی ایک نایاب مچھلی کی ویڈیو پوسٹ کی۔
یہ مچھلی اپنے بلبلے جیسے عجیب و غریب جسم اور غیرمعمولی خدوخال کی وجہ سے توجہ کا مرکز بن گئی۔ سوشل میڈیا صارفین نے اسے ‘Mars Attacks’ اور ‘Megamind’ جیسی مشہور فلموں کے خلائی کرداروں سے تشبیہ دی۔
ویڈیو میں مچھلی کو جہاز کی ریلنگ پر رکھا دیکھا جا سکتا ہے، اس کا نرم و جیلی نما جسم اور خوفناک آنکھیں اسے مزید پراسرار بنا رہی ہیں۔
ایک صارف نے حیرت کا اظہار کرتے ہوئے تبصرہ کیا: “یہ تو کسی اور سیارے کی مخلوق لگ رہی ہے!” جبکہ دوسرے نے مذاق میں لکھا: “یہ کہیں چرنوبل کا اثر تو نہیں؟” کچھ افراد نے تو اسے خطرناک قرار دے کر ختم کرنے کا مطالبہ بھی کر دیا۔
یہ مچھلی اتنی عجیب کیوں نظر آتی ہے؟
ماہرین کے مطابق، لمپ سکر مچھلی عام طور پر سمندر کی گہرائیوں میں پائی جاتی ہے۔ جب اسے سطح پر لایا جاتا ہے تو دباؤ میں اچانک کمی کے باعث اس کا جسم پھول جاتا ہے، جو اسے مزید غیرمعمولی بنا دیتا ہے۔ یہ مچھلی پتھروں سے چمٹنے کے لیے سکشن ڈسک کا استعمال کرتی ہے اور انتہائی نچلی سطحوں پر رہنے کی عادی ہوتی ہے۔
فیڈورٹسوو اس سے قبل بھی خوفناک وولف فش، جیلی نما سمندری مخلوقات اور دیگر انوکھی مچھلیوں کی تصاویر شیئر کر چکے ہیں، جو سمندر کی گہرائیوں میں چھپے حیران کن رازوں کو بے نقاب کرتی ہیں۔ ان کی حالیہ دریافت نے ایک بار پھر انسانوں کو یہ سوچنے پر مجبور کر دیا ہے کہ سمندر کی تہہ میں ابھی کتنے اور ناقابلِ یقین راز دفن ہیں؟
