لاہور۔وزیراعلیٰ پنجاب مریم نواز نے عید کے بعد لاہور میں صنعتی نمائش کے انعقاد کا اعلان کرتے ہوئے کہا کہ 35 سال بعد 16 روزہ ہارس اینڈ کیٹل شو نے بچوں اور بڑوں کے چہروں پر خوشیاں بکھیر دیں۔
ہارس اینڈ کیٹل شو کی آرگنائزنگ ٹیم کے لیے اپنے پیغام میں وزیراعلیٰ مریم نواز نے کہا کہ آپ نے پانچ ماہ کی مسلسل محنت سے شاندار ایونٹ کا انعقاد کیا، جس کی کامیابی آپ کی ٹیم کی محنت، لگن اور تخلیقی صلاحیتوں کا منہ بولتا ثبوت ہے۔
وزیراعلیٰ نے پی ایچ اے کے ڈائریکٹر جنرل طاہر وٹو سمیت تمام افسران اور عملے کو مبارکباد دیتے ہوئے کہا کہ آپ کی انتھک محنت کی بدولت عوام کو تفریحی لمحات میسر آئے۔ حکومت مستقبل میں بھی ایسے تفریحی ایونٹس کا انعقاد جاری رکھے گی اور ہارس اینڈ کیٹل شو کی شاندار روایت برقرار رکھی جائے گی۔
مریم نواز نے مزید کہا کہ 9 سے 24 فروری تک جاری رہنے والے ہارس اینڈ کیٹل شو میں پنجاب کی ثقافت اجاگر ہوئی۔ اس دوران 20 بڑے تفریحی پروگرام منعقد کیے گئے، جن میں ہزاروں فیملیز اور بچے شریک ہوئے، جبکہ 13 بین الاقوامی ٹیموں کی شرکت سے پاکستان اور پنجاب کا عالمی تشخص مزید بہتر ہوا۔ شہریوں نے سالوں بعد لاہور میں پولو، نیزہ بازی، بزکشی، تیر اندازی اور گھڑ سواروں کے سنسنی خیز مقابلے دیکھنے کا لطف اٹھایا۔
ایونٹ کے دوران چلڈرن فیسٹیول، ڈاگ شو، پھولوں کی نمائش، نادر و نایاب گاڑیوں کی نمائش اور رستم پنجاب دنگل کے دلچسپ مقابلے بھی منعقد کیے گئے، جس سے ہارس اینڈ کیٹل شو کا مزہ دوبالا ہو گیا۔ وزیراعلیٰ نے مزید اعلان کیا کہ عید کے بعد لاہور ایکسپو سینٹر میں صنعتی نمائش کا انعقاد کیا جائے گا۔
