وفاقی وزیر خزانہ سینیٹر محمد اورنگزیب نے پاکستان بینکنگ سمٹ 2025 سے خطاب کرتے ہوئے کہا کہ حکومت کو نجی شعبے کو کاروبار چلانے کے لیے مناسب پالیسیاں فراہم کرنی چاہئیں۔
پاکستان بینکس ایسوسی ایشن کی جانب سے منعقد کی جانے والی پہلی پاکستان بینکنگ سمٹ میں وزیر خزانہ سینیٹر محمد اورنگزیب کے علاوہ بینکوں کے صدور اور بین الاقوامی مندوبین بھی شریک ہیں۔
وزیر خزانہ نے کہا کہ ابھرتی ہوئی مارکیٹس نے پچھلے 25 برس بہترین طریقے سے گزارے ہیں، اور اس بات پر اتفاق کیا گیا ہے کہ ہمیں جو کچھ ہمارے پاس ہے، اس پر زیادہ توجہ دینے کی ضرورت ہے۔
انہوں نے مزید کہا کہ زیادہ تر وزرائے خزانہ کی توجہ پیداوار میں اضافے پر مرکوز رہی ہے، اور حکومت کو چاہیے کہ وہ نجی شعبے کے لیے پالیسیاں تشکیل دے تاکہ وہ کاروبار کو چلائے، اس کے علاوہ نج کاری کے عمل اور مالیاتی نظم و ضبط میں بہتری لانا بھی ضروری ہے۔
ان کا کہنا تھا کہ حال ہی میں وہ اور گورنر اسٹیٹ بینک سعودی عرب میں عالمی کانفرنس میں شریک تھے، جہاں ابھرتی ہوئی منڈیوں نے 2025 میں ترقی کے حوالے سے خوش آئند بات چیت کی۔ ان منڈیوں کے وزرائے خزانہ نے ڈی-ریگولیشن کو فروغ دینے اور بیوروکریسی کی پیچیدگیوں کو ختم کرنے پر زور دیا۔
وزیر خزانہ نے اس بات پر زور دیا کہ ابھرتی ہوئی معیشتوں کے درمیان تعاون اور تکنیکی معاونت کی ضرورت ہے، اور عالمی تجارت کے بجائے علاقائی تجارت پر زیادہ توجہ دی جانی چاہیے۔ انہوں نے مزید کہا کہ پی آئی اے کو دوبارہ نج کاری کے لیے مارکیٹ میں لایا جائے گا۔
