ملک میں غیر اعلانیہ مارشل لاء: عالیہ حمزہ

پشاور: پی ٹی آئی رہنما عالیہ حمزہ نے کہا ہے کہ موجودہ انتشار کی حالت پی ٹی آئی نہیں بلکہ حکومت پھیلا رہی ہے۔ وہ کل اسلام آباد میں احتجاج سے قبل راہداری اور حفاظتی ضمانت کے لیے پشاور ہائیکورٹ پہنچیں۔

عالیہ حمزہ نے میڈیا سے گفتگو کرتے ہوئے کہا کہ پنجاب میں حالات بہتر نہیں ہیں اور ان کے احتجاج کی کال پر کنٹینر لگا دیے جاتے ہیں۔ انہوں نے یہ بھی کہا کہ پی ٹی آئی کے لیڈرز اور کارکنوں پر ہونے والے ظلم کی مثال نہیں ملتی۔

انہوں نے مزید کہا کہ اگر وفاقی حکومت امن جرگے پر شیلنگ کرتی ہے تو پی ٹی آئی کے لوگ اس پر مرہم لگاتے ہیں۔ وزیراعلیٰ علی امین گنڈاپور صوبے کے لیے اپنی ذمہ داریاں نبھا رہے ہیں۔

عالیہ حمزہ کا کہنا تھا کہ شنگھائی تعاون کانفرنس پر احتجاج کو حکومت روک سکتی ہے، لیکن انہیں بانی پی ٹی آئی تک جلد رسائی دی جائے۔ انہوں نے کہا کہ یہ صرف پی ٹی آئی کی جنگ نہیں بلکہ پوری پاکستانی قوم کی جنگ ہے، اور خان صاحب کی بہنیں اور اہلیہ عوام کے مفاد کے لیے جیل کاٹ رہی ہیں۔

انہوں نے مزید کہا کہ پنجاب پولیس اب قانونی طور پر بغیر سرچ وارنٹ گھروں میں داخل ہو سکتی ہے، اور جو کچھ لاہور، میانوالی اور ڈی چوک میں ہوا، وہ عوام نے دیکھا ہے۔ انہوں نے یہ بھی کہا کہ ملک میں غیر اعلانیہ مارشل لاء نافذ کیا جا رہا ہے۔