اسلام آباد میں پی ٹی آئی کے احتجاج کے پیش نظر انتظامیہ نے شہر میں آنے والے تمام راستوں کو سیل کر دیا ہے، جس کی وجہ سے راولپنڈی اور اسلام آباد کے درمیان رابطہ منقطع ہوگیا ہے۔ برہان انٹرچینج پر خیبرپختونخوا سے آنے والے قافلوں اور ڈی چوک پر موجود کارکنوں پر پولیس نے شیلنگ کی، جس کے نتیجے میں متعدد کارکنوں کو گرفتار کیا گیا۔
پولیس نے تصدیق کی ہے کہ ڈی چوک سے تین افراد کو گرفتار کیا گیا، جن میں دو شہری اور ایک تحریک انصاف کا کارکن شامل ہے۔
چیرنگ کراس چوک کو دونوں جانب سے رکاوٹیں کھڑی کرکے بند کر دیا گیا ہے، جبکہ دیگر مقامات جیسے ایم ایچ چوک صدر، مریڑھ چوک اور مری روڈ بھی مکمل طور پر بند ہیں۔ ڈبل روڈ اسٹیڈیم بھی بند رکھا گیا ہے۔ ان پابندیوں کی وجہ سے شہریوں کو مشکلات کا سامنا کرنا پڑ رہا ہے۔
