ممبئی: بالی ووڈ کی ہٹ فلم ‘استری 2’ کی ہیروئن شردھا کپور بھی پاکستانی سپر ہٹ گانے ‘بلاک بسٹر’ کی مداح نکلیں۔
ایک انٹرویو کے دوران، شردھا کپور نے اپنے پسندیدہ گانے کے بارے میں بتایا کہ ان دنوں انہیں ایک خاص گانا بہت پسند آ رہا ہے جو ان کی میوزک پلے لسٹ میں سرِفہرست ہے۔ یہ گانا گلوکار فارس شفیع، عمیر بٹ، اور گھڑوی گروپ کا ‘بلاک بسٹر’ ہے۔
شردھا کپور نے کہا کہ یہ گانا نہ صرف شاندار ہے بلکہ اس کے بیٹس بھی انتہائی متاثر کن ہیں۔ اداکارہ کی پسندیدہ دھن کا نام سن کر ان کے ساتھ موجود اداکار راجکمار راؤ نے ‘بلاک بسٹر’ کی دُھن گنگنائی۔
بھارتی اداکارہ کی اس ویڈیو کلپ کو گانے کے میوزک کمپوزر ذوالفقار جبار خان، جنہیں ‘زلفی’ کے نام سے جانا جاتا ہے، نے اپنے آفیشل انسٹاگرام ہینڈل پر شیئر کیا۔
زلفی نے ویڈیو پوسٹ کرتے ہوئے کہا کہ یہ دیکھ کر بہت خوشی ہوئی کہ فن کی قدر سرحدوں سے آزاد ہے۔ مجھے بہت اچھا لگا کہ میرا گانا ‘بلاک بسٹر’ شردھا کپور کی پلے لسٹ میں ٹاپ پر ہے۔
