لاس اینجلس: ہالی ووڈ کی مشہور شخصیت انجلینا جولی اور بریڈ پٹ کی بیٹی شیلو جولی پٹ نے قانونی طور پر اپنے نام سے والد کا نام حذف کر دیا ہے۔
بین الاقوامی میڈیا رپورٹس کے مطابق، انجلینا جولی اور بریڈ پٹ کی 18 سالہ بیٹی شیلو نوویل جولی پٹ نے اپنے نام کو تبدیل کرکے شیلو نوویل جولی رکھنے کا ارادہ کیا تھا، اور اس مقصد کے لیے انہوں نے عدالت سے رجوع کیا۔
عدالت نے نام تبدیلی کے لیے شیلو نوویل کو اخبار میں اشتہار دینے کا حکم دیا تھا۔ اشتہار شائع کرنے کے بعد، شیلو نے عدالت میں اپنی درخواست جمع کروائی۔
رپورٹ میں کہا گیا ہے کہ عدالت نے نام تبدیلی کی درخواست منظور کر لی ہے، اب وہ قانونی طور پر شیلو جولی کے نام سے مشہور ہوں گی، اور اس طرح صرف اپنی والدہ کی کنیت برقرار رکھیں گی۔
واضح رہے کہ اس سے پہلے، شیلو کی بڑی بہن ویوین نے بھی اپنے نام سے ‘پٹ’ کا نام ہٹا دیا تھا، اور انہوں نے اپنے والدین کی علیحدگی کے بعد یہ قدم اٹھایا تھا۔
انجلینا جولی اور بریڈ پٹ نے 23 اگست 2014 کو شادی کی تھی، اور اس سابقہ جوڑی کے 6 بچے ہیں، تاہم 2019 میں انہوں نے اپنی راہیں جدا کر لیں۔
