نئی دہلی ۔بھارتی ارب پتی مکیش امبانی کو عام طور پر ملک میں سب سے زیادہ پرتعیش زندگی گزارنے والا شخص سمجھا جاتا ہے، لیکن ایسا نہیں ہے۔
ملیے سمرجیت سنگھ گائیکواڑ سے، جو 24000 کروڑ بھارتی روپے کے ایک شاندار محل میں رہتے ہیں، جس کی قیمت اگر پاکستانی روپوں میں تبدیل کی جائے تو یہ 7 کھرب، 72 ارب 19 کروڑ پاکستانی روپے سے زائد بنتی ہے۔
یہ محل 170 کمروں پر مشتمل ہے اور مکیش امبانی کے گھر سے بھی زیادہ عالیشان ہے۔
مکیش امبانی کا 15,000 کروڑ روپے کا محل دنیا کے مہنگے ترین نجی گھروں میں سے ایک ہے، لیکن سمرجیت کا محل برطانیہ کے شاہی محل، بکنگھم پیلس، کو بھی پیچھے چھوڑ دیتا ہے۔
اس محل کا نام “لکشمی ولاز” ہے، جسے “بڑودا محل” بھی کہا جاتا ہے اور یہ گائیکواڑ شاہی خاندان کا آبائی گھر ہے۔ بروڈا گجرات کے سابق حکمران تھے۔
سمرجیت سنگھ گائیکواڑ خاندان کے اہم فرد ہیں اور وڈودارا کے لکشمی ولاز پیلس کے موجودہ مالک ہیں، جہاں وہ اپنی بیوی رادھیکاراجے گائیکواڑ اور دیگر خاندان کے افراد کے ساتھ رہتے ہیں۔
یہ محل 1890 میں مہاراجہ سیاجی راؤ گائیکواڑ III نے 25 لاکھ روپے کی تخمینہ لاگت سے تعمیر کیا تھا۔ لکشمی ولاس پیلس دنیا کی سب سے بڑی نجی رہائش گاہ ہے، جس کے سامنے برطانوی شاہی خاندان کا بکنگھم پیلس اور مکیش امبانی کا 15,000 کروڑ کا محل کچھ بھی نہیں۔
