لاہور۔پاکستان کے سابق وزیرِاعظم میاں محمد نواز شریف کے پوتے حافظ زید حسین نواز کی قرآن پاک کی تلاوت کی ویڈیو سوشل میڈیا پر وائرل ہو گئی ہے، جس پر صارفین نے ان کے لیے دعاؤں اور نیک تمناؤں کا اظہار کیا ہے۔
رپورٹس کے مطابق، حسین نواز کے صاحبزادے زید حسین نواز نے سورة الرحمٰن کی تلاوت کرتے ہوئے ایک ویڈیو سوشل میڈیا پلیٹ فارم “ایکس” پر شیئر کی۔ ویڈیو میں ان کی خوبصورت آواز اور بہترین قراءت کو بہت سراہا جا رہا ہے۔
زید حسین نواز آج اپنی شادی کے سلسلے میں دلہن کو لینے کے لیے جاتی امرا سے بارات لے کر ماڈل ٹاؤن روانہ ہوں گے۔
اس سے قبل ان کا نکاح اور رسمِ حنا کی تقریبات جاتی امرا میں 25 دسمبر کو منعقد ہوئیں، جن میں 500 مہمانوں کو مدعو کیا گیا تھا۔ زید حسین نواز کا نکاح نواز شریف کے قریبی دوست شیخ حبیب الرحمٰن کی صاحبزادی ایمن حبیب سے ہوا۔ رسمِ حنا کی تقریب میں معروف گلوکار راحت فتح علی خان نے اپنی پرفارمنس سے محفل کو یادگار بنا دیا۔
شادی کی مختلف تقریبات میں امریکا، برطانیہ، سعودی عرب، قطر، عرب امارات اور بھارت سے مہمانوں کو مدعو کیا گیا ہے۔ حسین نواز، ان کی فیملی، اور ان کی بہن عاصمہ نواز بھی شادی میں شرکت کے لیے پاکستان پہنچ چکے ہیں۔ مہمانوں کی حفاظت کے لیے سیکیورٹی انتظامات پنجاب پولیس کے سپرد ہیں۔
