وفاقی وزیر اطلاعات عطا اللہ تارڑ نے کہا ہے کہ تحریک انتشار صرف این آر او حاصل کرنے کے لیے ملکی امن کو خطرے میں ڈال رہی ہے۔
پریس کانفرنس کے دوران وفاقی وزیر اطلاعات نے کہا کہ پاکستان کرکٹ ٹیم کی حالیہ ون ڈے میچ میں کامیابی حوصلہ افزا ہے اور انہیں یقین ہے کہ پاکستان کرکٹ ٹیم آنے والے دنوں میں اپنا کھویا ہوا مقام دوبارہ حاصل کرے گی۔ انہوں نے قومی کرکٹ ٹیم کی آج کی کارکردگی کو بہترین قرار دیا۔
عطا اللہ تارڑ نے یہ بھی بتایا کہ وزیراعظم 10 نومبر کو سعودی عرب روانہ ہوں گے، جہاں وہ فلسطین کے معاملے پر ریاض سمٹ میں شرکت کریں گے۔ اس سمٹ میں مشرق وسطیٰ کی موجودہ صورتحال پر تفصیل سے بات کی جائے گی۔ انہوں نے کہا کہ وزیراعظم نے ہر عالمی فورم پر غزہ اور فلسطین کے حوالے سے آواز بلند کی ہے، اور اقوام متحدہ کی جنرل اسمبلی میں ان کی تقریر کو دنیا بھر میں سب سے زیادہ سنا گیا تھا۔
وزیراعظم کے بارے میں بات کرتے ہوئے عطا اللہ تارڑ نے کہا کہ وزیراعظم COP 29 کے اجلاس میں بھی شرکت کریں گے۔
پی ٹی آئی کے حوالے سے بات کرتے ہوئے وفاقی وزیر نے کہا کہ تحریک انتشار اپنے مقصد میں مصروف ہے اور صرف این آر او کے لیے ملک میں امن و امان کو خطرے میں ڈال رہی ہے۔ انہوں نے کہا کہ خیبر پختونخوا میں اساتذہ کے حقوق کو نظرانداز کرنے کے لیے تشدد کا راستہ اختیار کیا جا رہا ہے، اور پی ٹی آئی کے بانی چیئرمین پر کرپشن کے الزامات ہیں۔ انہوں نے کہا کہ خیبر پختونخوا کے اساتذہ کی آواز سننا ضروری ہے، کیونکہ تحریک انتشار اپنے صوبے میں ہی اپنے مطالبات پیش کر رہی ہے۔
عطا اللہ تارڑ نے مزید کہا کہ پختونخوا میں نوجوانوں کے مسائل پر کوئی توجہ نہیں دی جا رہی اور وہاں کا تعلیمی نظام بدحال ہو چکا ہے۔ احتجاج دراصل اپنے رہنما کی رہائی کے لیے کیا جا رہا ہے۔
وفاقی وزیر اطلاعات نے ملک کی معاشی صورتحال پر بھی بات کی اور کہا کہ ملک کی معیشت استحکام کی طرف بڑھ رہی ہے۔ زرمبادلہ کے ذخائر میں اضافہ ہو رہا ہے اور معاشی اشاریے بہتری کی طرف جا رہے ہیں۔ انہوں نے کہا کہ پاکستان کی معیشت کو مزید مستحکم کرنے کے لیے حکومت دن رات کوشش کر رہی ہے اور اکتوبر میں ترسیلات زر میں مزید اضافہ ہونے کی توقع ہے۔
عطا اللہ تارڑ نے بتایا کہ متحدہ عرب امارات کا ایک وفد سرمایہ کاری کے لیے پاکستان کا دورہ کر رہا ہے، اور اماراتی وفد کی وزیراعظم سے ملاقات متوقع ہے۔ وزیراعظم کی جانب سے سرمایہ کاری کو بھرپور توجہ دی جا رہی ہے۔
انہوں نے کہا کہ سپریم کورٹ بار کے الیکشن کا نتیجہ 26 ویں آئینی ترمیم کی حمایت کرتا ہے۔ وفاقی وزیر نے مزید کہا کہ بدتمیزی کرنے والے شرپسند عناصر اب سوشل میڈیا پر معافیاں مانگ رہے ہیں، لیکن ان کی تمام تر کوششوں کے باوجود پاکستان ترقی کی راہ پر گامزن ہے۔ انہوں نے کہا کہ مخالفین چاہتے تھے کہ پاکستان دیوالیہ ہو جائے، لیکن اللہ کے کرم سے پاکستان اس خطرے سے باہر نکل آیا ہے۔ وزیر اطلاعات نے یہ بھی کہا کہ تحریک انصاف مکمل طور پر ناکام ہو چکی ہے۔
