پاکستان کے مشہور فلم پروڈیوسر ندیم بیگ نے کہا ہے کہ فلم اسٹار ہمایوں سعید اپنی جسمانی ساخت، شخصیت اور اداکاری کی بنا پر بالی ووڈ خانز، یعنی شاہ رخ، سلمان اور عامر خان سے زیادہ بہتر اداکار ہیں۔
حال ہی میں ایک انٹرویو کے دوران میزبان عفت عمر نے ندیم بیگ سے سوال کیا کہ کیا وہ ہمایوں سعید کے ساتھ ایکشن فلم بنانے جا رہے ہیں؟ جس پر انہوں نے جواب دیا کہ ہاں، وہ اس منصوبے میں شامل ہیں۔
ندیم بیگ کی بات سن کر عفت عمر نے کہا کہ اب ہمایوں سعید کو بھی سلمان خان، شاہ رخ خان اور عامر خان کی طرح ایکشن میں دیکھنے کا موقع ملے گا۔
اس پر ندیم بیگ نے کہا کہ اگر میں سلمان، شاہ رخ اور عامر خان کو نہیں جانتا ہوتا اور میرے سامنے ان تینوں کے ساتھ ہمایوں سعید کھڑے ہوتے تو بطور فلمساز میں ہمایوں کو ہی اپنی فلم میں شامل کرتا۔
انہوں نے مزید کہا کہ ہمایوں سعید کی فٹنس، شخصیت اور اداکاری، تینوں بالی ووڈ خانز سے بہتر ہیں، اسی لیے میرا انتخاب ہمایوں سعید ہی ہوتا۔
