لاہور: پاکستانی میوزک انڈسٹری کے لیجنڈری گلوکار وارث بیگ نے حال ہی میں سوئنگ کے سلطان اور سابق کرکٹر وسیم اکرم کی ‘بدو بدی’ ویڈیو پر شکوہ کیا ہے۔
وارث بیگ نے اداکار و میزبان احمد علی بٹ کے پوڈکاسٹ میں مہمان کے طور پر شرکت کی جہاں انہوں نے اپنے کیریئر اور پاکستانی میوزک کے بارے میں تفصیل سے بات کی۔ انہوں نے کہا کہ آج کل کے دور میں لوگ موسیقی سیکھنے کی بجائے، اگر کسی کی تھوڑی سی آواز اچھی ہو تو وہ خود کو گلوکار سمجھنے لگتے ہیں۔
وارث بیگ نے اس بات پر افسوس کا اظہار کیا کہ حالیہ دور میں موجود موسیقی کے اُستاد شاندار فنکاروں کو تربیت دیتے ہیں، لیکن لوگ استادوں کے پاس جانا پسند نہیں کرتے۔ سوشل میڈیا نے ایسے لوگوں کو شہرت دی ہے جنہوں نے موسیقی کے فن کو صحیح طرح سے سیکھا نہیں ہے، جیسے کہ چاہت فتح علی خان۔
وسیم اکرم کی ‘بدوبدی’ ویڈیو پر تبصرہ کرتے ہوئے، وارث بیگ نے کہا کہ انہیں وسیم اکرم سے شکوہ ہے کہ انہوں نے چاہت کے ‘بدوبدی’ پر تو ویڈیو بنائی، مگر کبھی میڈم نور جہاں کے کسی گانے پر ویڈیو نہیں بنائی۔
رشتوں کو نبھانے کیلئے تمنا بھاٹیا کا قیمتی مشورہ
انہوں نے مزید کہا کہ ہم باصلاحیت فنکاروں کو آگے لانے کی بجائے صرف سوشل میڈیا پر مشہور لوگوں کو ہی فروغ دیتے ہیں۔ وارث بیگ نے یہ بھی کہا کہ چاہت کو چاہت ہی رہنے دیا جائے، کیونکہ وہ فتح علی خان نہیں ہیں، اور انہیں فتح علی خان کے نام پر متعارف نہ کرایا جائے۔
