چھوٹے روبوٹس کی تخلیق کے دوران ایک بڑا چیلنج یہ ہوتا ہے کہ وہ اپنے اردگرد کے ماحول میں موجود رکاوٹوں کو عبور کرنے میں دشواری محسوس کرتے ہیں۔
اسی مسئلے کا حل تلاش کرتے ہوئے، ہارورڈ یونیورسٹی کے محققین نے فطرت سے تحریک لے کر ایک منفرد اور ہتھیلی کے برابر سائز کا روبوٹ تیار کیا ہے۔ یہ روبوٹ نہ صرف چلنے کی صلاحیت رکھتا ہے بلکہ چھلانگ لگا کر بلند سطحوں تک پہنچنے، اشیاء کو اپنی جانب کھینچنے اور پیچیدہ سطحوں پر حرکت کرنے کی مہارت بھی رکھتا ہے۔
ہارورڈ مائیکرو روبوٹکس لیب کے ڈائریکٹر، پروفیسر رابرٹ ووڈ کے مطابق، یہ نیا مائیکرو روبوٹ کیڑوں کی طرح چھلانگ لگا سکتا ہے۔ اگرچہ اس کا چلنا ایک مستحکم اور مؤثر حرکت کا انداز فراہم کرتا ہے، تاہم اب بھی رکاوٹوں کو عبور کرنے میں محدودیت موجود ہے۔
پروفیسر رابرٹ کا کہنا تھا کہ چھلانگ لگانا اگرچہ رکاوٹوں کو عبور کرنے میں مدد دیتا ہے، لیکن اس پر قابو پانا ذرا مشکل ہوتا ہے۔ لہٰذا چلنے اور چھلانگ لگانے دونوں انداز کو یکجا کرکے یہ ننھا روبوٹ غیر ہموار اور قدرتی ماحول میں کسی حد تک کامیابی سے حرکت کر سکتا ہے۔
یہ لچکدار اور ذہین مشین قدرت کے بہترین جمناسٹ کیڑے، اسپرنگ ٹیل سے متاثر ہوکر بنائی گئی ہے، جو زمین پر موجود تقریباً ہر جگہ پایا جاتا ہے۔ یہ کیڑا محض 18 ملی سیکنڈ میں خطرہ محسوس ہونے پر خود کو فضا میں اچھال کر شکار سے بچ نکلتا ہے، اور یہی خوبی اس روبوٹ میں شامل کی گئی ہے۔
