’’وزیراعظم جلد ایک اور بڑی خوشخبری کا اعلان کرنے والے ہیں‘‘

لاہور۔پنجاب کی وزیر اطلاعات عظمیٰ بخاری نے کہا ہے کہ وزیراعظم شہباز شریف عوام کو جلد ایک اور اہم خوشخبری دینے والے ہیں۔ صوبائی دارالحکومت میں پریس کانفرنس کے دوران انہوں نے حکومت کے ریلیف اقدامات، معاشی بہتری، اور عوامی فلاح سے متعلق مختلف منصوبوں پر تفصیل سے روشنی ڈالی۔

انہوں نے کہا کہ وزیراعظم نے عید الفطر کے بعد گرمیوں کے پیش نظر بجلی کی قیمتوں میں کمی کا فیصلہ کیا، جو کہ عوام کے لیے ایک بروقت اور فائدہ مند اقدام ہے۔ عظمیٰ بخاری نے اس فیصلے کو ایک بڑی کامیابی قرار دیتے ہوئے کہا کہ حکومت نے نہ صرف عوام کو ریلیف فراہم کیا بلکہ بین الاقوامی مالیاتی ادارے (آئی ایم ایف) کو بھی اس پر قائل کیا۔

ان کا کہنا تھا کہ وہ عناصر جو نجی پاور کمپنیوں اور بجلی کے شعبے میں ذاتی مفادات رکھتے ہیں، حکومت کے عوام دوست اقدامات سے ناخوش ہیں۔

پنجاب حکومت کی کارکردگی کے بارے میں بات کرتے ہوئے انہوں نے بتایا کہ رمضان سہولت بازاروں کے ذریعے عوام کو 1.11 ارب روپے کی بچت فراہم کی گئی، جب کہ وہاں 3.57 ارب روپے کی خریداری کی گئی۔ مزید بتایا گیا کہ 28 ہزار شہریوں نے سہولت بازاروں سے 3 کروڑ روپے مالیت کا سامان مفت ہوم ڈیلیوری کے ذریعے حاصل کیا۔

انہوں نے اعلان کیا کہ اگست تک 13 مزید سہولت بازار قائم کیے جائیں گے، جبکہ موجودہ بازاروں کو 69 کروڑ روپے کی لاگت سے سولر انرجی پر منتقل کیا جا رہا ہے۔

عظمیٰ بخاری نے کہا کہ وزیراعلیٰ مریم نواز ہر اُس مقام پر منصوبے شروع کریں گی جہاں عوامی فلاح ممکن ہو۔ “سہولت آن دی گو” پروگرام کے تحت 14 مقامات پر موبائل سہولت مراکز بھی قائم کیے جا رہے ہیں۔ صفائی، صحت، اور روزگار کی فراہمی جیسے اہم شعبوں پر بھی حکومت بھرپور توجہ دے رہی ہے۔