ممبئی: بھارت کے امیر ترین افراد کی فہرست میں عموماً اڈانی، امبانی، ٹاٹا اور برلا جیسے نام شامل ہوتے ہیں، لیکن بلومبرگ کی ارب پتی افراد کی فہرست میں ایک بھارتی مسلمان بھی جگہ پانے میں کامیاب ہوئے ہیں، جن کی دولت اربوں ڈالرز میں ہے۔
انڈیا ڈاٹ کام کی رپورٹ کے مطابق، ممبئی میں 1947 میں پیدا ہونے والے عظیم پریم جی کی دولت کا اندازہ 27.8 ارب ڈالر لگایا گیا ہے، اور کہا جاتا ہے کہ وہ روزانہ اتنی بڑی رقم عطیات میں دیتے ہیں کہ اس رقم کے برابر بھارت کے کئی امیرترین افراد کی سالانہ آمدنی کا خواب بھی ممکن نہیں۔
میڈیا رپورٹس کے مطابق، عظیم پریم جی کا خاندان روزانہ تقریباً 27 کروڑ بھارتی روپے عطیات دیتا ہے۔
عظیم پریم جی کے والد، محمد پریم جی، انگریزوں سے آزادی کے دوران میانمار میں چاول کا کاروبار کرتے تھے، لیکن آزادی کے بعد انہوں نے اپنا کاروبار بھارت منتقل کیا اور بھارت کو اپنا مستقل مسکن بنایا۔
عظیم پریم جی مشہور آئی ٹی کمپنی وائپرو کے بانی ہیں اور بھارت کے معروف کاروباری خاندانوں میں ان کا شمار کیا جاتا ہے۔
بھارتی میڈیا کے مطابق، ہورون انڈیا فلنٹھروپی لسٹ 2021 کے مطابق، عظیم پریم جی نے مالی سال 2020-2021 کے دوران 9,713 کروڑ بھارتی روپے یا روزانہ 27 کروڑ روپے عطیات میں دیے۔
فوربز کے مطابق، عظیم پریم جی 22 فروری 2025 کو بھارت کے امیرترین مسلمان شخصیت بن گئے، اور ان کی دولت کا حجم 12.2 ارب ڈالر تک پہنچ چکا ہے، جبکہ وہ بھارت کے امیرترین افراد میں 19 ویں نمبر پر ہیں۔
عظیم پریم جی عالمی سطح پر امیرترین افراد کی فہرست میں 195 ویں نمبر پر ہیں۔
