نیو دہلی: بیوی کی ٹک ٹاک ویڈیو نے ایک پولیس کانسٹیبل شوہر کو نوکری سے معطل کروا دیا۔
یہ واقعہ بھارتی شہر چندی گڑھ میں 20 مارچ کو پیش آیا تھا اور اس کی ویڈیو سوشل میڈیا پر تیزی سے وائرل ہو گئی۔
ویڈیو میں خاتون کو ایک مشہور ہریانوی گانے پر رقص کرتے ہوئے دیکھا جا سکتا ہے، جبکہ ارد گرد ٹریفک جام ہوتا دکھائی دے رہا ہے۔
خاتون اپنی نند کے ہمراہ گوردوارے گئی تھی، اور واپسی پر انھوں نے ٹک ٹاک کی ریل بنائی۔
ویڈیو وائرل ہونے کے بعد ہیڈ کانسٹیبل جسبیر نے تھانے میں شکایت درج کرائی، جس کے بعد پولیس نے تحقیقات شروع کر دیں۔
پولیس نے خاتون اور اس کی نند کے خلاف عوامی مقامات پر رکاوٹ ڈالنے اور عوامی تحفظ کو خطرے میں ڈالنے کے الزامات کے تحت مقدمہ درج کر لیا۔
خاتون کے شوہر، ٹریفک کانسٹیبل اجے کنڈو کو بھی معطل کر دیا گیا۔
اس فیصلے پر سوشل میڈیا پر مختلف ردعمل سامنے آئے۔ کچھ لوگوں نے کہا کہ کانسٹیبل کو اپنی بیوی کے عمل کی سزا نہیں ملنی چاہیے تھی، جبکہ دیگر نے سوشل میڈیا پر ریل بنانے کے بڑھتے ہوئے رجحان کو تنقید کا نشانہ بنایا۔
ایک صارف نے تبصرہ کیا کہ معطلی کا فیصلہ غلط ہے، کیونکہ اس نے تو بس تفریح کی تھی، جبکہ دوسرے نے کہا کہ یہ ریل بنانے کا جنون کیا بن گیا ہے؟ لوگوں کو کچھ اور کرنا چاہیے۔
