اسلام آباد۔صدرِ مملکت آصف علی زرداری نے یومِ پاکستان کے موقع پر مختلف شعبوں میں نمایاں خدمات انجام دینے والی ملکی و غیر ملکی شخصیات کو سول ایوارڈز سے نوازا، جن میں سب سے اعلیٰ اعزاز پیپلز پارٹی کے بانی شہید ذوالفقار علی بھٹو کو دیا گیا۔
صدر مملکت نے 23 مارچ کی مناسبت سے 69 نمایاں شخصیات کو سول ایوارڈز عطا کیے۔ اس موقع پر ایوانِ صدر میں ایک باوقار تقریب منعقد کی گئی، جہاں مختلف شعبوں میں شاندار کارکردگی کا مظاہرہ کرنے والی شخصیات کو نشانِ پاکستان، نشانِ امتیاز، نشانِ خدمت، ہلالِ امتیاز، ہلالِ شجاعت، ستارہِ امتیاز، ستارہِ شجاعت، ستارہِ قائداعظم، صدارتی تمغہ برائے حسنِ کارکردگی، تمغہِ پاکستان اور تمغہِ امتیاز دیے گئے۔
سابق وزیراعظم اور پیپلز پارٹی کے بانی شہید ذوالفقار علی بھٹو کو جمہوریت، ملک اور عوامی خدمت کے اعتراف میں بعد از وفات نشانِ پاکستان عطا کیا گیا، جو ان کی صاحبزادی صنم بھٹو نے وصول کیا۔ اس موقع پر وہ جذباتی ہو گئیں جبکہ تقریب کا ماحول بھٹو کے نعروں سے گونج اٹھا۔
مزید برآں، ایئر مارشل (ر) راجہ شاہد حامد (مرحوم) کو بعد از وفات نشانِ امتیاز جبکہ سلطان علی اکبر علانہ کو نشانِ خدمت سے نوازا گیا۔ اسی طرح شہداء پولیس اہلکاروں، ایس پی محمد اعجاز خان، ڈی ایس پی علامہ اقبال، ڈی ایس پی سردار حسین، کانسٹیبل ارشاد علی اور جہانزیب سمیت دیگر کو ہلالِ شجاعت (بعد از وفات) دیا گیا۔
ڈاکٹر توقیر حسین شاہ، کیپٹن (ر) خرم آغا، علی حیدر گیلانی، خواجہ انور مجید، حسین داؤد، پروفیسر ڈاکٹر شہریار، ڈاکٹر زریاب سیٹنا، جاوید جبار، سادیہ راشد، عامر حفیظ ابراہیم، جمی انجینئر، عمر فاروق، ڈاکٹر نوید شیروانی سمیت کئی شخصیات کو ہلالِ امتیاز عطا کیا گیا۔
کیپٹن (ر) حمزہ انجم شہید اور ملک سبز علی شہید کو بعد از وفات ستارہِ شجاعت دیا گیا، جو ان کے اہلِ خانہ نے وصول کیا۔
اس ایوارڈ سے نوازے جانے والوں میں محمد سمیر الرحمن، احمد اسحاق جہانگیر، ڈاکٹر غلام محمد علی، عرفان نواز میمن، سردار محمد آفتاب احمد خان وٹو، ڈاکٹر حامد عتیق سرور، علی سلمان حبیب (بعد از وفات)، وقار الدین سید، ایاز خان، پروفیسر ڈاکٹر ضیاء الحق، امتیاز حسین، جمیل احمد، سید اظہر حسنین عابدی، ظفر وقار تاج، محمد حسین عرف مراد سدپارہ (بعد از وفات)، بہروز حسین بلوچ، ثناء ہاشوانی اور صفی ناز منیر شامل ہیں۔
نوید احمد فرید، راشد وحید خواجہ، انیقہ بانو اور برکت شاہ کو صدارتی تمغہ برائے حسنِ کارکردگی عطا کیا گیا۔
حیدر قربونوف اور ڈاکٹر کرسٹین برن ہلڈ کو ستارہِ قائداعظم جبکہ آگسٹینو ڈا پولنزا اور پروفیسر ویلویا پیاچنتینی کو تمغہِ پاکستان دیا گیا۔
مختلف شعبوں میں نمایاں کارکردگی دکھانے والوں کو تمغہِ امتیاز سے نوازا گیا، جن میں سید شکیل شاہ، اشہد جواد، امین محمد لاکھانی، ریحان مہتاب چاولہ، سید جواد حسین جعفری، پروفیسر ڈاکٹر عثمان قمر، محترمہ ڈاکٹر سارہ قریشی، ڈاکٹر اکرام اللہ، محمد یوسف خان اور سرور منیر راؤ شامل ہیں۔
مزید برآں، صحافی حسن ایوب، ڈاکٹر سید عابد مہدی کاظمی، میر نادر خان مگسی اور ڈاکٹر شن من لیو کو بھی اعزازات دیے گئے۔
تقریب میں وفاقی وزراء، چیئرمین سینیٹ، ارکانِ پارلیمنٹ، سفارت کار، سول سوسائٹی کے نمائندگان، میڈیا کے افراد اور دیگر معززین نے شرکت کی۔
