راولپنڈی ۔چیئرمین جوائنٹ چیفس آف اسٹاف کمیٹی اور مسلح افواج کے سربراہان نے یومِ پاکستان کی 85ویں سالگرہ کے موقع پر پوری قوم کو گرمجوش مبارکباد پیش کرتے ہوئے عزم ظاہر کیا ہے کہ مادرِ وطن کا دفاع ہر حال میں یقینی بنایا جائے گا۔
پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان میں سروسز چیفس کا کہنا تھا کہ 23 مارچ وہ تاریخی دن ہے جب ایک خودمختار ریاست کے قیام کا خواب حقیقت میں بدلنے کی راہ پر گامزن ہوا۔
یہ دن ہمارے عزم، یقین اور استقامت کی علامت ہے، جو پاکستانی قوم کے غیر متزلزل حوصلے اور یکجہتی کو ظاہر کرتا ہے۔ اللہ تعالیٰ کے فضل و کرم سے پاکستان جمہوری اصولوں اور اسلامی اقدار کی روشنی میں ترقی کی منازل طے کر رہا ہے۔
آئی ایس پی آر کے اعلامیے میں کہا گیا کہ پاکستان اپنے جمہوری اداروں کو مضبوط بنانے اور عوام کی فلاح و بہبود کے لیے پوری توانائی کے ساتھ سرگرم عمل ہے، جبکہ مسلح افواج سرحدوں کی حفاظت اور قومی خودمختاری کے دفاع کے لیے ہر دم تیار ہیں۔
مزید کہا گیا کہ آج پاکستان عالمی برادری میں ایک ذمہ دار اور مستحکم ملک کے طور پر اپنا کردار ادا کر رہا ہے، جو امن، استحکام اور باہمی تعاون کے فروغ کے لیے کوشاں ہے۔ ہم ایک متحد قوم کے طور پر تابناک مستقبل کی جانب گامزن ہیں اور اپنے دیرپا استحکام کے لیے پرعزم ہیں۔
اعلامیے کے مطابق مسلح افواج ملک میں امن و امان کے قیام کے لیے اپنا کردار ادا کرتی رہیں گی، کیونکہ یہ ہماری قومی شناخت کی عکاس ہے۔ پاکستان ایک پرامن ملک ہے، اور ہم اس کے تحفظ کو ہر قیمت پر یقینی بنائیں گے، ان شاء اللہ
