نئی دہلی: بھارت میں سب سے مہنگی شادی کا اعزاز کسی امبانی کو نہیں بلکہ سابق کرناٹک وزیر جناردھن ریڈی کو حاصل ہے، جنہوں نے 2016 میں اپنی بیٹی برہمانی کی شادی پر 1600 کروڑ پاکستانی روپے سے زائد خرچ کیے۔
یہ شاندار شادی 16 نومبر 2016 کو منعقد ہوئی، جس میں 50,000 سے زائد مہمانوں نے شرکت کی۔ شادی کی تقریبات پانچ دن تک جاری رہیں، اور اس کے بے مثال انتظامات پورے ملک میں زیرِ بحث رہے۔
جناردھن ریڈی نے اپنی بیٹی کی شادی کو یادگار بنانے کے لیے بنگلورو کے فائیو اسٹار اور تھری اسٹار ہوٹلوں میں 1,500 کمرے بک کروائے۔ شادی کا مقام وجے نگر سلطنت کے شاہی مندروں سے متاثر ہو کر ڈیزائن کیا گیا تھا، جسے بالی ووڈ کے معروف آرٹ ڈائریکٹرز نے تخلیق کیا تھا۔
برہمانی نے مشہور ڈیزائنر نیتا للو کی تیار کردہ لال کانچی ورم ساڑھی زیب تن کی، جس کی قیمت 55 کروڑ روپے تھی۔ اس ساڑھی کی خاص بات یہ تھی کہ اسے خالص سونے کے دھاگوں سے کڑھائی کرکے تیار کیا گیا تھا، جس نے اسے انتہائی قیمتی اور منفرد بنا دیا۔
80 کروڑ روپے مالیت کا ہیروں سے جڑا چوکر ہار
قیمتی پتھروں سے جڑی مانگ ٹیکا اور روایتی پنچڈالہ زیور
یہاں تک کہ ان کی چوٹی بھی ہیرے جڑے زیورات سے آراستہ تھی
مجموعی طور پر، دلہن کے زیورات کی مالیت 3 ارب روپے تھی، جبکہ عروسی میک اپ پر بھی ایک کروڑ روپے خرچ کیے گئے۔
شادی میں مدعو مہمانوں کو 40 بیل گاڑیاں اور 2,000 لگژری ٹیکسیاں فراہم کی گئیں۔
وی وی آئی پی مہمانوں کے لیے 15 ہیلی کاپٹرز کرائے پر لیے گئے۔
شاہی ضیافت میں 16 اقسام کی نایاب مٹھائیاں پیش کی گئیں، اور ہر پلیٹ کی قیمت تقریباً 3,000 روپے تھی۔
یہ شادی ایسے وقت میں ہوئی، جب بھارت نوٹ بندی (Demonetization) کے بحران سے گزر رہا تھا، جس کی وجہ سے عام عوام کو سخت مشکلات کا سامنا تھا۔ اتنی بڑی رقم خرچ کرنے پر جناردھن ریڈی کو شدید تنقید کا سامنا کرنا پڑا، اور مختلف سیاسی جماعتوں نے ان کے اثاثوں پر سوالات اٹھائے۔
حال ہی میں، اننت امبانی اور رادھیکا مرچنٹ کی شادی کو بھارت کی مہنگی ترین شادی کہا جا رہا ہے، جس پر مبینہ طور پر 600 ملین ڈالر (تقریباً 1670 کروڑ روپے) خرچ کیے گئے۔ تاہم، جناردھن ریڈی کی بیٹی کی شادی آج بھی بھارت کی سب سے شاندار اور پرتعیش شادیوں میں شمار کی جاتی ہے۔
