لاہور: وزیراعلیٰ پنجاب مریم نواز نے کہا ہے کہ اسلامو فوبیا عالمی امن اور بین المذاہب ہم آہنگی کے لیے ایک سنگین خطرہ ہے۔
انسداد اسلاموفوبیا کے عالمی دن پر اپنے ایک پیغام میں وزیراعلیٰ پنجاب مریم نواز کا کہنا تھا کہ دنیا بھر میں مسلمانوں کے خلاف ہونے والے امتیازی سلوک، نفرت اور تعصب کی شدید مذمت کی جاتی ہے۔ انہوں نے کہا کہ اقوام متحدہ کی جنرل اسمبلی میں اسلاموفوبیا کے خلاف قرارداد پیش کرکے پاکستان نے اس مسئلے پر آواز اٹھائی۔
مریم نواز نے مزید کہا کہ اسلام ایک دینِ رحمت ہے جو امن، محبت، برداشت اور انسانی عظمت کا پیغام دیتا ہے، لیکن بدقسمتی سے اسلام اور مسلمانوں کے خلاف پراپیگنڈا کا رجحان بڑھ رہا ہے۔ اسلاموفوبیا عالمی امن اور بین المذاہب ہم آہنگی کے لیے خطرہ بن چکا ہے، اور اسلاموفوبیا کے خاتمے کی ہر کاوش کی حمایت کی جانی چاہیے۔ انہوں نے اقوام متحدہ اور دیگر عالمی اداروں سے درخواست کی کہ وہ نفرت انگیز رویوں کے خلاف مؤثر اور یقینی اقدامات کریں۔
وزیراعلیٰ پنجاب کا کہنا تھا کہ اقوام عالم کو کشمیری، فلسطینی اور دیگر مسلمانوں کے جان، مال، حقوق اور عزت و وقار کے تحفظ کو یقینی بنانا چاہیے۔ انہوں نے کہا کہ پنجاب حکومت مذہبی ہم آہنگی اور اقلیتوں کے احترام کو فروغ دینے کے لیے تمام ممکنہ اقدامات کر رہی ہے اور ایسا پنجاب بنانا چاہتی ہے جہاں ہر مذہب اور مسلک کو مساوی حقوق اور عزت ملے۔
مریم نواز نے اس موقع پر مزید کہا کہ اسلامو فوبیا سے نمٹنے کے لیے دنیا کو اسلام کے حقیقی تشخص سے آگاہ کیا جانا چاہیے اور ہر قسم کی منافرت کے خلاف آواز اٹھانا ضروری ہے۔ ان کا کہنا تھا کہ پائیدار عالمی امن کے لیے سب کو اپنے کردار کا بھرپور انداز میں ادا کرنا ہوگا۔
