اسلام آباد ۔قومی اسمبلی میں جعفر ایکسپریس کی ہائی جیکنگ کے واقعہ پر مذمتی قرارداد متفقہ طور پر منظور کرلی گئی۔ قرارداد میں کہا گیا کہ پاکستانی عوام دہشتگردی کے خلاف جنگ میں بلاتفریق متحد ہو جائیں اور تمام شکلوں میں انتہا پسندی کو مسترد کر دیں۔
اس قرارداد کو وفاقی وزیر پارلیمانی امور ڈاکٹر طارق فضل چوہدری نے قومی اسمبلی میں پیش کیا، اور یہ قرارداد اپوزیشن سمیت تمام سیاسی جماعتوں کے ارکان کے دستخطوں سے منظور ہوئی۔ قرارداد میں جعفر ایکسپریس کو ہائی جیک کرنے، شہریوں کی زندگیوں کو خطرے میں ڈالنے، اور ملک کے امن کو تہہ و بالا کرنے والی دہشتگردی کی تمام کارروائیوں کی پرزور مذمت کی گئی ہے۔
قرارداد میں کہا گیا ہے کہ ’قوم دہشت گردی کے خاتمے کے لیے ہر ممکن اقدام اٹھانے کا عزم کرتی ہے۔ کسی بھی گروہ اور فرد کو ملک کے امن، خوشحالی اور خودمختاری کو نقصان پہنچانے کی اجازت نہیں دی جائے گی۔ ملک کی علاقائی حدود میں خوف، نفرت یا تشدد پھیلانے کی اجازت نہیں دی جائے گی۔‘
قرارداد کے متن میں مزید کہا گیا کہ ملک کے کسی بھی حصے میں دہشتگردی کی کسی بھی سرگرمی کی اجازت نہیں دی جائے گی، اور دہشتگردی کو جڑ سے اکھاڑ پھینکنے کے لیے انتھک محنت کرنے کا عہد کیا گیا ہے۔
قرارداد میں ان تمام بہادر مردوں اور خواتین کا شکریہ ادا کیا گیا جنہوں نے اس المناک واقعے میں اپنی جانوں کا نذرانہ پیش کیا۔ افواج پاکستان، ایف سی اور دیگر قانون نافذ کرنے والے اداروں کو ان کے غیر متزلزل عزم، بہادری اور شہریوں کی جانوں کے تحفظ اور پاکستان کی سالمیت کے تحفظ کے لیے دی جانے والی قربانیوں پر خراج تحسین پیش کیا گیا۔
اس میں یہ بھی کہا گیا کہ اس واقعے میں ملوث دہشت گردوں کو بے اثر کرنے میں سکیورٹی فورسز کی بہادرانہ کوششیں ان کے عزم اور تیاری کی عکاسی کرتی ہیں۔ قرارداد میں پاکستانی عوام کو دہشت گردی کے خلاف جنگ میں متحد ہونے اور تمام شکلوں میں انتہا پسندی کو مسترد کرنے کی اپیل کی گئی، تاکہ آنے والی نسلوں کے لیے ملک کا امن، تحفظ اور خوشحالی یقینی بنائی جا سکے۔
