اسلام آباد۔متحدہ عرب امارات سے گزشتہ 16 ماہ کے دوران 10 ہزار 100 سے زیادہ پاکستانیوں کی ملک بدری اور 2024 میں 50 ہزار سے زیادہ پاکستانیوں کی ویزا درخواستوں کو مسترد کیے جانے کا انکشاف ہوا ہے۔
پاکستانی شہریوں کے خلاف دنیا کے مختلف ممالک میں کریک ڈاؤن جاری ہے، تاہم متحدہ عرب امارات نے اس حوالے سے سب سے زیادہ پاکستانیوں کو ملک بدر کیا۔
وزارت خارجہ کے ذرائع کے مطابق متحدہ عرب امارات سے ستمبر 2023 سے جنوری 2025 تک ملک بدر کیے گئے پاکستانیوں کے اعداد و شمار سامنے آئے ہیں۔
ذرائع کے مطابق گزشتہ 16 ماہ میں متحدہ عرب امارات سے 10 ہزار 100 سے زائد پاکستانیوں کو ملک بدر کیا گیا۔
ذرائع کے مطابق ستمبر 2023 سے جنوری 2025 تک 4 ہزار 740 سزا یافتہ پاکستانی قیدیوں کو ملک بدر کیا گیا، جو مختلف جیلوں میں اپنی سزا کاٹ چکے تھے، جبکہ اس دوران 5 ہزار 800 دیگر پاکستانی شہریوں کو مختلف نوعیت کے جرائم کی بنیاد پر ملک بدر کیا گیا۔
وزارت خارجہ کے ذرائع نے یہ بھی بتایا کہ متحدہ عرب امارات نے سال 2024 میں 50 ہزار سے زیادہ پاکستانی شہریوں کی ویزا درخواستیں مسترد کر دیں۔
