پشاور۔ پشاور ہائیکورٹ نے پاکستان تحریک انصاف کے رہنما سینیٹر فیصل جاوید کو حفاظتی ضمانت دیتے ہوئے درج مقدمات میں گرفتار نہ کرنے کا حکم دے دیا۔
پشاور ہائیکورٹ کے جسٹس صاحبزادہ اسد اللہ اور جسٹس ثابت اللہ نے سینیٹر فیصل جاوید کی مقدمات کی تفصیلات کے لیے دائر درخواست پر سماعت کی۔
درخواست گزار کے وکیل نے عدالت کو بتایا کہ مقدمات کی تفصیلات کے لیے درخواست دائر کی گئی ہے۔
ڈپٹی اٹارنی جنرل ملک دانیال خان نے عدالت کو بتایا کہ فیصل جاوید کے خلاف اسلام آباد میں 16 ایف آئی آرز درج ہیں، اور ہم نے ان کی تفصیلات فراہم کر دی ہیں، فیصل جاوید کو وہاں کی عدالتوں میں پیش ہونا چاہیے۔
عدالت نے کہا کہ وفاقی حکومت کے مزید کیسز ہیں تو اس کی رپورٹ بھی جمع کرائیں۔ سپیشل پراسیکیوٹر جنرل نیب محمد علی نے کہا کہ نیب کی جانب سے جواب جمع کر دیا جائے گا۔
جسٹس صاحبزادہ اسد اللہ نے ریمارکس دیے کہ ہم نے کل آپ کو ضمانت دی تھی، اس کیس میں بھی وہی تاریخ دی جاتی ہے۔ عدالت نے فیصل جاوید کو 15 اپریل تک حفاظتی ضمانت دے دی اور کہا کہ آپ عمرہ کے لیے جائیں، آپ کو گرفتار نہیں کیا جائے گا۔
