لاہور۔وزیراعلیٰ پنجاب مریم نواز شریف نے کہا ہے کہ پانچ سال میں پانچ لاکھ گھر بنانے کا ہدف پورا کرنے کے لیے وہ پرعزم ہیں۔
وزیراعلیٰ پنجاب مریم نواز شریف کی زیر صدارت ایک خصوصی اجلاس ہوا، جس میں 3 مرلہ فری پلاٹ سکیم سے متعلق امور کا جائزہ لیا گیا۔ پنجاب ہاؤسنگ اینڈ ٹاؤن پلاننگ ایجنسی (پھاٹا) کے ڈی جی نے تفصیلی بریفنگ دی۔
مریم نواز شریف نے پھاٹا کو مارچ تک ہدف پورا کرنے کی ہدایت کرتے ہوئے فری پلاٹ حاصل کرنے والے افراد کو گھر بنانے کے لیے قرض دینے کے امکان کا بھی جائزہ لیا۔
وزیراعلیٰ نے 19 اضلاع میں پھاٹا کی سابقہ 23 ہاؤسنگ سکیموں کی بہتری اور بحالی کا حکم دیتے ہوئے ہدایت کی کہ ان سکیموں کی بحالی کے لیے فنڈز جاری کیے جائیں۔
دوران بریفنگ بتایا گیا کہ “اپنی چھت، اپنا گھر” پروگرام کے تحت قرضوں کی واپسی شروع ہو چکی ہے، اور اس پروگرام کے تحت 100 فیصد قرضوں کی واپسی ہو چکی ہے۔ اس پروگرام کے تحت 9661 گھر زیر تکمیل ہیں۔
