اسلام آباد۔وزیراعظم شہباز شریف نے کنزیومر پرائس انڈیکس کے حوالے سے افراط زر میں مسلسل کمی پر اطمینان کا اظہار کرتے ہوئے کہا کہ معیشت کی بہتری، کاروبار اور سرمایہ کاری کے فروغ کے لیے تمام ادارے مل کر کام کر رہے ہیں۔ ان کا کہنا تھا کہ امید ہے کہ افراط زر میں مزید کمی ہوگی۔
ایک بیان میں وزیراعظم نے کہا کہ موجودہ حکومت اپنا ایک سال مکمل کر رہی ہے، اور اس موقع پر یہ ایک خوش آئند خبر ہے کہ افراط زر فروری 2025 میں 1.5 فیصد تک پہنچ گیا، جو ستمبر 2015 کے بعد سب سے کم شرح ہے۔ انہوں نے مزید کہا کہ جولائی 2024 سے فروری 2025 تک افراط زر کی اوسط 5.9 فیصد رہی، جبکہ پچھلے مالی سال کے اسی عرصے میں یہ اوسط 28 فیصد تھی، جو ایک نمایاں کمی ہے۔
شہباز شریف نے کہا کہ حکومت کی معاشی ٹیم کی شاندار کاوشوں کے نتیجے میں معاشی اشاریے بہتر ہو رہے ہیں اور معیشت میں مسلسل بہتری مستعد ٹیم ورک کا نتیجہ ہے۔ وزیراعظم کا کہنا تھا کہ معیشت کی بہتری، کاروبار اور سرمایہ کاری کے فروغ کے لیے تمام ادارے مل کر کام کر رہے ہیں، اور میکرو اکنامک بہتری کا فائدہ عوام تک پہنچنا شروع ہوگیا ہے۔ عوام کو ارزاں نرخوں پر اشیائے ضروریہ کی فراہمی حکومت کی اولین ترجیح ہے۔
علاوہ ازیں، وزیراعظم سے برطانوی ہائی کمشنر جین میریٹ نے ملاقات کی۔ اس دوران شہباز شریف نے شاہ چارلس سوئم کے لیے نیک خواہشات کا اظہار کیا اور ان کی مکمل صحت یابی کی دعا کی۔ وزیراعظم نے شاہ چارلس سوئم کو پاکستان کے دورے کی دعوت دی اور دوطرفہ تعلقات میں ہونے والی پیشرفت پر اطمینان کا اظہار کیا۔
وزیراعظم نے غزہ اور یوکرین میں دیرپا امن کے قیام کے لیے عالمی سطح پر اجتماعی کوششوں کی ضرورت پر زور دیا۔ برطانوی ہائی کمشنر نے کہا کہ ان کا ملک پاکستان کے ساتھ اپنے تعلقات کو مزید مستحکم بنانے اور پاکستان کی معیشت میں شراکت داری جاری رکھنے کے لیے پرعزم ہے۔
وزیرِاعظم نے رمضان کے دوران سحر و افطار کے اوقات میں گیس کی فراہمی میں مشکلات کا نوٹس لیا اور فوری اقدامات کی ہدایت کی۔ اس سلسلے میں رات گئے ہنگامی اجلاس منعقد کیا گیا جس میں سوئی کمپنیوں کے منیجنگ ڈائریکٹرز اور سینیئر انتظامیہ کے ساتھ تفصیل سے گفتگو کی گئی۔ وزیراعظم کی ہدایات پر سوئی سدرن گیس کمپنی نے فوری طور پر گیس پریشر میں 10 فیصد اضافہ کرنے کا فیصلہ کیا، اور گیس کی فراہمی سحر و افطار کے اوقات میں بہتر بنانے کے لیے اقدامات کیے گئے۔
وزیرِاعظم نے جنگلی حیات کے عالمی دن پر اپنے پیغام میں جنگلی حیات کے تحفظ کے عزم کا اعادہ کرتے ہوئے کہا کہ حکومت حیاتیاتی تنوع کی اہمیت سے متعلق شعور بیدار کرنے کے لیے کوشاں ہے اور پاکستان کی خوبصورت جنگلی حیات کی بہتری کے لیے مل کر کام کرنے کی ضرورت ہے۔
