لاہور۔وزیر اعلیٰ پنجاب مریم نواز شریف نے فروغ سیاحت کے لیے اہم فیصلے کرتے ہوئے پنجاب میں 170 سیاحتی مقامات اور ٹریلز کی تعمیر، مرمت اور بحالی کی اصولی منظوری دے دی ہے۔
ترجمان حکومت پنجاب کی جانب سے جاری بیان میں کہا گیا کہ وزیر اعلیٰ پنجاب کی زیر صدارت ایک اہم اجلاس منعقد ہوا، جس میں پنجاب کی پہلی مکمل ٹورازم میگنی فیسینٹ ایپ تیار کی گئی ہے، جو جلد آغاز کی جائے گی۔ اس ایپ کے ذریعے 170 سیاحتی مقامات کی ورچوئل سیر کی جا سکے گی۔
بیان میں کہا گیا کہ میگنی فیسینٹ ایپ میں پنجاب کی سیاحت سے متعلق تمام فیچرز شامل ہوں گے، جیسے ٹریول وزٹ اور ہوٹل بکنگ، فوڈ پانڈا اور دیگر سروسز حاصل کرنا، اور چیٹ بوٹ کے ذریعے مفید معلومات کا حصول۔
وزیر اعلیٰ مریم نواز شریف نے پنجاب کے سب سے بڑے اور جامع ٹورازم پلان کی اصولی منظوری بھی دے دی۔ اس پلان کے تحت پنجاب بھر میں مذہبی، تاریخی، قدیمی ورثہ، آثار قدیمہ اور ایکوٹورازم کو فروغ دیا جائے گا۔ قدیم تہذیب سے قربت کا احساس دلانے کے لیے سیاحوں کے لیے ٹورسٹ ویلج بھی بنائے جائیں گے، اور پنجاب میں پہلی مرتبہ ٹورازم ٹریل تیار کی جائیں گی۔
دوسری جانب، وزیر اعلیٰ نے کہا کہ ڈسٹرکٹ مال روڈ، وال سٹی آف لاہور، سکھ سائٹ، جی ٹی روڈ کی مغل یادگاریں، سالٹ رینج، بھاٹی گیٹ، ٹیکسالی گیٹ، گوجرانوالہ اور ایمن آباد سکھ ٹورازم ٹریل میں شامل کی جائیں گی۔ مختلف شہروں کے سیاحتی مقامات کو ٹورازم کلسٹر کے طور پر ڈویلپ کیا جائے گا۔
اس کے علاوہ، گندھار تہذیب سے متعلق گندھار ٹریل میں ٹیکسلا میوزیم، دھر ما راچی کا، جو لیاں، سرکیپ اور گری قلعہ شامل ہوں گے۔ پنجاب میں گوردواروں اور گرجاگھروں کی قدیمی عمارتوں کی بحالی کی تجویز کا بھی جائزہ لیا جائے گا۔ ملتان کی لیونگ ہیریٹیج سائٹ قلعہ کہنہ قاسم باغ کو وادی سندھ کی تہذیب کے نشانات کے طور پر بحال کیا جائے گا۔
مزید برآں، اُچ شریف میں زائرین کی سہولت کے لیے خصوصی ٹریل ڈویلپ کی جائے گی، اور چھانگا مانگا فارسٹ پارک اور لال سوہانرا نیشنل پارک کو ایکو ٹورازم کے فروغ کے لیے ڈویلپ کیا جائے گا۔
وزیر اعلیٰ نے پنجاب ٹورازم اینڈ ہیریٹیج اتھارٹی ایکٹ 2025ء کی تیاری کا بھی اعلان کیا، جس کا مقصد سیاحت کے فروغ کے لیے گورننس میں بہتری لانا ہے۔ وزیر اعلیٰ نے پنجاب کی پہلی ٹورازم اینڈ ہیریٹیج اتھارٹی کی اصولی منظوری بھی دی۔
مریم نواز نے کہا کہ پنجاب میں عالمی سیاحت کے فروغ کی بنیاد رکھی جا رہی ہے، اور تمام سیاحتی مقامات کو عالمی معیار کے مطابق بنایا جائے گا۔ ٹیکسلا کو مکمل طور پر ٹورسٹ سائٹ بنایا جائے گا اور وہاں فائیو سٹار ہوٹل بھی تعمیر کیا جائے گا۔ ان کا کہنا تھا کہ پورے پنجاب میں سیاحت کے فروغ پر توجہ مرکوز کی جائے گی، اور سیاحتی ہب بنایا جائے گا۔
