اسلام آباد ۔پی ٹی آئی کے انٹرا پارٹی انتخابات کے کیس کی سماعت کے دوران پارٹی کے اندرونی امور کے حوالے سے سوالات اٹھائے گئے۔
الیکشن کمیشن میں پی ٹی آئی کے انٹرا پارٹی انتخابات کیس کی سماعت ممبر سندھ نثار درانی کی قیادت میں 3 رکنی کمیشن نے کی، جس میں بیرسٹر گوہر، اکبر ایس بابر اور دیگر افراد الیکشن کمیشن میں پیش ہوئے۔
سماعت کے دوران ممبر کے پی نے سوال اٹھایا کہ پی ٹی آئی کے اندرونی معاملات کون سنبھال رہا ہے؟ میڈیا میں سلمان اکرم راجہ کا نام آ رہا ہے، وہ پارٹی میں کس عہدے پر ہیں؟ پی ٹی آئی کے انٹرا پارٹی انتخابات متنازعہ ہیں۔
اس پر بیرسٹر گوہر نے وضاحت دی کہ ہم صرف انڈور مینجمنٹ کے تحت امور کو چلا رہے ہیں۔ جب آپ سرٹیفکیٹ فراہم کریں گے، تو مسئلہ حل ہو جائے گا۔
ممبر الیکشن کمیشن نے کہا کہ ہائی کورٹ سے حکم امتناع ختم کرائیں، جس پر بیرسٹر گوہر نے جواب دیا کہ اس کیس کے حوالے سے کوئی حکم امتناع نہیں ہے۔ ممبر الیکشن کمیشن نے کہا کہ یہ کیس ٹرائل نہیں ہے، اور یہ ممکن نہیں کہ اس پر فیصلہ محفوظ کر کے عدالتی فیصلے کا انتظار کیا جائے۔ آپ کی فراہم کردہ دستاویزات مکمل نہیں ہیں۔
اکبر ایس بابر نے کہا کہ یہ عوامی مفاد کا معاملہ ہے۔ الیکشن کمیشن نے بھی سپریم کورٹ میں انٹرا پارٹی انتخابات کو متنازعہ قرار دیا ہے۔ ہم چاہتے ہیں کہ الیکشن کمیشن آج ہی اس پر فیصلہ سنائے۔بعد ازاں کیس کی آئندہ سماعت 8 اپریل تک ملتوی کر دی گئی۔
