واشنگٹن۔ٹرمپ انتظامیہ نے منجمد شدہ غیر ملکی امداد میں سے 5.3 ارب ڈالر جاری کر دیے ہیں، جن میں پاکستان سے متعلق پروگراموں کے لیے 397 ملین ڈالر بھی شامل ہیں۔
غیر ملکی خبر رساں ایجنسی کے مطابق، امریکی صدر ڈونلڈ ٹرمپ کی حکومت نے زیادہ تر فنڈز سیکیورٹی اور انسداد منشیات کے پروگراموں کے لیے مختص کیے ہیں، جبکہ انسانی ہمدردی کی امداد کے لیے محدود رقم فراہم کی گئی ہے۔
امریکی کانگریس کے ایک عہدیدار کے مطابق، پاکستان میں امریکی تعاون سے چلنے والے منصوبوں کے لیے 397 ملین ڈالر مختص کیے گئے ہیں، جن میں خاص طور پر ایف-16 طیاروں کے استعمال کی نگرانی سے متعلق فنڈز شامل ہیں۔
رپورٹس کے مطابق، یو ایس ایڈ کے مختلف منصوبوں کے لیے 100 ملین ڈالر سے کم رقم جاری کی گئی ہے، جبکہ ریڈ کراس کو 56 ملین ڈالر علیحدہ فراہم کیے گئے ہیں۔
واضح رہے کہ اس سے قبل صدر ڈونلڈ ٹرمپ نے اقتدار میں آتے ہی غیر ملکی امداد کو منجمد کرنے کا حکم دیا تھا، تاہم اب ان فنڈز کو بحال کر دیا گیا ہے۔
