اسلام آباد۔ذرائع کے مطابق عوام کو ریلیف فراہم کرنے کے لیے حکومت نے بجلی 8 سے 10 روپے فی یونٹ تک سستی کرنے کا منصوبہ تیار کر لیا ہے، جس کے تحت گردشی قرضے کے حجم کو کم کیا جائے گا۔
منصوبے کے تحت قرضوں کی ادائیگی میں 1.3 کھرب روپے کی کمی لائی جائے گی، جس سے مالی گنجائش پیدا ہوگی، اور یہ رقم بجلی کے نرخوں میں کمی کے لیے استعمال کی جائے گی۔ اس اقدام سے بجلی کے شعبے میں جاری مالی نقصانات میں بھی کمی آئے گی۔
ذرائع کا کہنا ہے کہ آئی ایم ایف کا جائزہ مشن آئندہ ماہ کے اوائل میں پاکستان کا دورہ کرے گا، جہاں حکومت اس منصوبے کو آئی ایم ایف کے سامنے پیش کرے گی۔
یہ بات قابل ذکر ہے کہ بجلی کی قیمتوں میں کمی کے لیے ٹیکسوں میں کمی کا منصوبہ پہلے ہی آئی ایم ایف مسترد کر چکا ہے۔ تاہم، حکومت کے نئے منصوبے کے تحت بنیادی ٹیرف میں 8 سے 10 روپے فی یونٹ تک کمی متوقع ہے۔