پاکستانی کرکٹ ٹیم کے فاسٹ بولر شاہین شاہ آفریدی کا کہنا ہے کہ سہ ملکی کرکٹ سیریز چیمپیئنز ٹرافی کی تیاری کا بہترین موقع ہے، اور جنوبی افریقہ کے خلاف کامیابی پر بے حد خوشی محسوس کر رہے ہیں۔
نیشنل اسٹیڈیم میں ‘مکس زون’ میں میڈیا سے گفتگو کرتے ہوئے شاہین شاہ آفریدی نے بتایا کہ ان کی انگلی بالکل ٹھیک ہے، ایکسرے بھی کرایا گیا ہے، اگرچہ معمولی سوجن باقی ہے، لیکن امید ہے کہ جلد مکمل ٹھیک ہو جائے گی۔ انہوں نے تسلیم کیا کہ ان کے آخری اوورز توقعات کے مطابق نہیں جا رہے۔
جنوبی افریقی بیٹر میتھیوز کے ساتھ تلخ کلامی سے متعلق سوال پر شاہین نے وضاحت دی کہ میچ کے دوران دونوں کے درمیان سخت جملوں کا تبادلہ ہوا، تاہم بعد میں معاملہ خوش اسلوبی سے ختم ہوگیا۔ انہوں نے کہا کہ پہلے میتھیو خاموش رہا، لیکن جب میں نے اسے وکٹ کے لیے پریشان کیا، تو اس نے ردعمل دیا، جس کے بعد دونوں میں بحث چھڑ گئی۔
شاہین کا مزید کہنا تھا کہ میدان میں جو کچھ بھی ہوتا ہے، وہ کھیل کا حصہ ہوتا ہے اور میچ کے بعد سب کچھ ختم ہو جاتا ہے۔ انہوں نے بتایا کہ میچ کے بعد میتھیو سے ملاقات ہوئی، ہاتھ ملایا اور ہم اچھے دوست بن گئے۔ ان کا کہنا تھا کہ یہاں کوئی بابر یا شاہین نہیں، صرف پاکستان ہے، اور جب تک منفی سوچ ختم نہیں ہوگی، ترقی ممکن نہیں۔
