امریکا میں رواں موسمِ سرما میں فلو وائرس اپنی بلند ترین سطح پر پہنچ گیا ہے، اور حالیہ اعداد و شمار کے مطابق، اس نے پچھلے 15 سال کا ریکارڈ توڑ دیا ہے۔
فلو وائرس کی شدت کا اندازہ ان مریضوں کی تعداد سے لگایا جاتا ہے جو اسپتالوں اور کلینکس کا رخ کر رہے ہیں۔ بیماریوں کے کنٹرول اور روک تھام کے مراکز (CDC) کے جاری کردہ ڈیٹا کے مطابق، گزشتہ ہفتے فلو کے مریضوں کی تعداد 2009-2010 کے بعد کسی بھی سرمائی فلو سیزن سے زیادہ رہی۔
اگرچہ کورونا وائرس اور آر ایس وی جیسی دیگر سانس کی بیماریاں بعض اوقات فلو سے مشابہت رکھتی ہیں، لیکن کورونا وائرس کا پھیلاؤ کمی کی طرف گامزن ہے، جبکہ سانس کی بیماری آر ایس وی بھی ختم ہوتی جا رہی ہے۔
فلو کے شدید پھیلاؤ نے متعدد امریکی ریاستوں میں اسکولوں کی بندش پر مجبور کر دیا ہے۔
اعداد و شمار کے مطابق، پچھلے ہفتے 43 امریکی ریاستوں میں فلو کے زیادہ یا بہت زیادہ کیسز رپورٹ کیے گئے، جن میں جنوبی، جنوب مغربی، اور مغربی ریاستیں سب سے زیادہ متاثر ہوئیں۔
