لاہور۔معروف پاکستانی اداکارہ رباب ہاشم نے ایک حالیہ ٹی وی شو میں اپنے ایک مداح کے غیر معمولی رویے کا دلچسپ اور حیران کن واقعہ بیان کیا۔
رباب ہاشم نے انکشاف کیا کہ انہیں انسٹاگرام پر ایک صارف کی جانب سے روزانہ تقریباً 200 میسجز موصول ہو رہے تھے۔ پہلے تو انہوں نے اس بات کو نظرانداز کیا، لیکن پھر ایک ایسا واقعہ پیش آیا جس نے انہیں حیرت میں ڈال دیا۔
انہوں نے بتایا، “ایک دن میں شوٹنگ سے چھٹی پر تھی اور گھر پر موجود تھی۔ اچانک گھر کی بیل بجی، دروازہ کھولا تو ایک خاتون اور مرد موجود تھے جو اندرون سندھ سے آئے تھے۔ ان کے ہاتھ میں ایک باسکٹ تھی جس میں تحائف رکھے ہوئے تھے۔ انہوں نے کہا کہ ہم بہت دور سے آئے ہیں، آپ کو یہ تحائف قبول کرنے ہوں گے۔”
رباب ہاشم نے تحائف قبول کر لیے لیکن جب وہ لوگ گھر کے باہر ہی کھڑے رہے اور جانے کا نام نہیں لے رہے تھے تو اداکارہ نے ان سے درخواست کی کہ وہ تحائف واپس لے جائیں اور یہ وضاحت کی کہ کسی کے گھر آنا مناسب نہیں۔ اس کے باوجود، میسجز آنے کا سلسلہ بند نہیں ہوا۔
رباب ہاشم نے کہا کہ یہ ایک عجیب اور غیر معمولی تجربہ تھا، جس نے نہ صرف مداحوں کی حد سے بڑھتی ہوئی دیوانگی کو ظاہر کیا بلکہ یہ بھی دکھایا کہ مشہور شخصیات کو اپنی نجی زندگی میں کس قسم کے چیلنجز کا سامنا کرنا پڑ سکتا ہے۔
