لاہور۔مشہور ٹک ٹاکر ذوالقرنین سکندر کو حالیہ دنوں میں ایک غیر متوقع واقعے کا سامنا کرنا پڑا جب وہ اپنے قریبی دوست کی شادی میں شرکت کے دوران گرفتار ہوگئے۔
تقریب کے دوران پولیس نے انہیں بغیر کسی واضح وجہ کے حراست میں لے لیا اور سات سے آٹھ گھنٹوں تک زیر حراست رکھا، جس نے ذوالقرنین کے اہل خانہ اور دوستوں کو شدید پریشانی میں مبتلا کر دیا۔
ذوالقرنین سکندر نے اس واقعے پر سوشل میڈیا پلیٹ فارم کے ذریعے مایوسی اور غصے کا اظہار کیا۔ اپنے ویڈیو بیان میں انہوں نے کہا، “اس ملک میں کچھ بھی ممکن ہے۔ مجھے ان افراد کا علم نہیں ہے جو مجھے بدنام کرنے کی کوشش کر رہے ہیں۔ میرے خلاف ایک جعلی ایف آئی آر درج کرائی گئی ہے اور میں جلد ہی اس معاملے پر تفصیل سے بات کروں گا۔”
ذوالقرنین نے اس واقعے کی تفصیلات اپنی ایک ویڈیو میں شیئر کی ہیں اور اسکرین شاٹ کے ذریعے تحریری معلومات فراہم کی ہیں۔
ٹک ٹاکر کے مداح اس واقعے پر افسوس کا اظہار کر رہے ہیں اور ان کے حق میں آواز اٹھا رہے ہیں۔
یاد رہے کہ اس سے قبل ٹک ٹاکر رجب بٹ کو بھی گرفتار کیا گیا تھا اور عدالت نے گزشتہ روز انہیں سزا بھی سنائی ہے۔
