لاہور۔پاکستانی شوبز کی مشہور جوڑی مرزا گوہر رشید اور اداکارہ کبریٰ خان نے اپنی شادی کا باضابطہ اعلان کر دیا ہے۔
گوہر رشید اور کبریٰ خان نے انسٹاگرام پر ایک دلچسپ ویڈیو شیئر کر کے اپنی شادی کا اعلان کیا ہے، جو سوشل میڈیا پر مداحوں کی توجہ کا مرکز بن گئی ہے۔
ویڈیو میں مومل مرزا، شہزاد شیخ اور ان کی اہلیہ، ہمایوں سعید سمیت دیگر مشہور فنکاروں کو مزاحیہ انداز میں “میرے یار کی شادی” پر تبصرہ کرتے ہوئے دکھایا گیا ہے۔ ویڈیو کے کیپشن میں لکھا گیا ہے “آپ کے پیار اور دعاؤں کے ساتھ بسم اللہ”۔
ویڈیو کے آخر میں گوہر رشید اور کبریٰ خان ایک جیسے ہوڈی میں ملبوس مزاحیہ انداز میں یہ بتاتے ہیں کہ وہی ہیں جن کی شادی ہو رہی ہے، جس پر کبریٰ خان شرما جاتی ہیں اور گوہر رشید انہیں گلے لگا لیتے ہیں۔
یاد رہے کہ سوشل میڈیا پر گزشتہ ماہ سے کبریٰ خان اور گوہر رشید کی شادی کی تیاریوں کی افواہیں گردش کر رہی تھیں، اور اب اس خوبصورت جوڑی نے شادی کے بندھن میں بندھنے کا اعلان کر کے ان افواہوں کی تصدیق کر دی ہے۔
