تہران۔یران کے دارالحکومت تہران میں سپریم کورٹ کی عمارت کے باہر فائرنگ کا واقعہ پیش آیا، جس میں دو ججوں کو قتل کردیا گیا۔ غیر ملکی خبر رساں ادارے کی رپورٹ کے مطابق، ایرانی عدلیہ کی ویب سائٹ میزان آن لائن نے بتایا کہ فائرنگ کے واقعہ میں سپریم کورٹ کے تین ججوں کو نشانہ بنایا گیا۔
رپورٹ کے مطابق، اس واقعہ میں دو جج شہید ہوگئے جبکہ ایک جج زخمی ہوا۔ بیان میں کہا گیا کہ حملہ آور نے ججوں پر فائرنگ کرنے کے بعد خود کو بھی ہلاک کر لیا۔ ایرانی میڈیا نے اطلاع دی ہے کہ سپریم کورٹ کے جج کا محافظ بھی زخمی ہوا ہے۔
اس وقت تک ججوں کے قتل کی وجہ واضح نہیں ہو سکی ہے۔ عدلیہ نے مرنے والے ججوں کی شناخت آیت اللہ محمد مغیثی اور علی رازنی کے ناموں سے کی ہے۔
غیر ملکی میڈیا کے مطابق، حزب اختلاف سے تعلق رکھنے والی ویب سائٹس نے ماضی میں کہا تھا کہ محمد مغیثی ان لوگوں کے مقدمات سے جڑے ہوئے تھے جنہیں ان سیاستدانوں کے مطابق سیاسی قیدی سمجھا جاتا تھا۔
