عمران خان اور بشری بی بی کو نیا قیدی نمبر الاٹ
راولپنڈی ۔احتساب عدالت کے فیصلے کے بعد عمران خان اور ان کی اہلیہ کو نیا قیدی نمبر الاٹ کر دیا گیا جبکہ بشری بی بی کو خواتین کی بیرکس میں منتقل کیا گیا ہے
ذرائع نے بتایا ہے کہ پی ٹی آئی کے بانی چیئرمین اور ان کی اہلیہ کو 190 ملین پاو¿نڈز کیس میں احتساب عدالت کی جانب سے سزا سنائے جانے کے بعد قیدی نمبر جاری کیا گیا ہے۔
عدالت نے کرپشن ریفرنس میں عمران خان کو 14 سال قید بامشقت اور ان کی اہلیہ بشریٰ بی بی کو 7 سال قید بامشقت کے ساتھ بھاری جرمانے کی سزا سنائی ہے۔ اس کے علاوہ، القادر ٹرسٹ اور القادر یونیورسٹی کو سرکاری تحویل میں لینے کا حکم بھی جاری کیا گیا ہے۔
فیصلے کے بعد، عمران خان کو باضابطہ طور پر قیدی قرار دے کر قیدی نمبر دیا گیا، جبکہ بشریٰ بی بی کو کمرہ عدالت سے گرفتاری کے بعد جیل ہسپتال لے جایا گیا، جہاں ان کا طبی معائنہ اور بائیومیٹرک کیا جا رہا ہے۔
جیل ذرائع، کے مطابق، قانونی کارروائیاں مکمل کرنے کے بعد بشریٰ بی بی کو خواتین بیرکس میں منتقل کیا جائے گا۔ مزید یہ کہ بشریٰ بی بی کا ذاتی سامان اڈیالہ جیل پہنچا دیا گیا ہے، اور سامان سے بھری ایک گاڑی جیل میں داخل ہو چکی ہے۔
