اسلام آباد ۔پاکستان کے قومی خلائی ادارے سپارکو نے مقامی طور پر تیار کردہ الیکٹرو آپٹیکل سیٹلائٹ ای او-1 کامیابی سے لانچ کر دیا ہے۔
یہ سیٹلائٹ چین کے جی چھوان سیٹلائٹ لانچ سینٹر سے خلا میں بھیجا گیا، جبکہ لاہور میں واقع سیٹلائٹ ریسرچ اینڈ ڈویلپمنٹ سنٹر میں اس تاریخی لمحے کا مشاہدہ کیا گیا۔
سپارکو کے مطابق ای او-1 ایک جدید اور مقامی طور پر تیار کردہ سیٹلائٹ ہے، جسے ماحولیاتی مانیٹرنگ، زراعت، دفاع اور نگرانی جیسے مقاصد کے لیے استعمال کیا جائے گا۔
ادارے کا کہنا ہے کہ ای او-1 مشن پاکستان کی اسپیس سائنس اور جدید اختراعات میں پیش رفت کا مظہر ہے، جو سپارکو کی تکنیکی مہارت اور عزم کو ظاہر کرتا ہے۔
یہ سیٹلائٹ پاکستان کے خلائی ٹیکنالوجی کے سفر میں ایک اہم پیش رفت ہے۔ اس سے پہلے مئی 2024 میں، پاکستان کا پہلا ملٹی مشن سیٹلائٹ پاک سیٹ ایم ایم ون بھی چین کے ژیچانگ سیٹلائٹ لانچ سینٹر سے خلا میں روانہ کیا گیا تھا۔
