لاہور۔وزیر اعلیٰ پنجاب مریم نواز نے مستحق اور کم آمدنی والے افراد کے لیے 3 مرلے کے مفت پلاٹ فراہم کرنے کی ایک نئی اسکیم متعارف کرانے کا اعلان کیا ہے۔
وزیر اعلیٰ پنجاب مریم نواز شریف نے کالا شاہ کاکو میں زہرہ ہومز اور مسکنِ راوی کے منصوبے کا افتتاح کیا۔ اس موقع پر انہوں نے منصوبے کا معائنہ کیا اور سہولیات کا جائزہ لیا۔
وزیر اعلیٰ نے 100 خاندانوں کو گھروں کے الاٹمنٹ لیٹرز اور چابیاں تقسیم کیں اور زہرہ ہومز و مسکنِ راوی کے معیار اور دستیاب سہولتوں پر اطمینان کا اظہار کیا۔ انہیں زہرہ ہومز اور مسکنِ راوی کے حوالے سے تفصیلی بریفنگ دی گئی۔
بریفنگ کے مطابق، کالا خطائی روڈ، لاہور کے قریب موضع نہرہ پور میں ابتدائی طور پر 100 مکانات تعمیر کیے گئے ہیں، ہر مکان 400 مربع فٹ رقبے پر مشتمل ہے، جس میں دو بیڈروم، ایک باورچی خانہ، ایک باتھ روم اور ایک صحن شامل ہیں۔
یہ مکانات جدید ترین “ترین ای پی ایس سمارٹ پینل ٹیکنالوجی” کے ذریعے تعمیر کیے گئے ہیں جو انہیں زلزلے سے محفوظ، توانائی کے مؤثر اور ماحول دوست بناتی ہے۔ منصوبے کے ہر گھر میں 5 کلو واٹ کا سولر سسٹم نصب ہوگا۔ کمیونٹی میں صاف پانی کی فراہمی کے لیے آر او پلانٹ، ایک اسکول، کھیل کے میدان، مسجد اور ڈسپنسری جیسی سہولتیں بھی فراہم کی گئی ہیں۔
بریفنگ کے دوران بتایا گیا کہ مسکنِ راوی ہاؤسنگ اسکیم روڈا اور ای پی ایس سولوشنز پاکستان کے اشتراک سے مکمل کی گئی ہے۔ تقریب کے دوران مسلم لیگ (ن) کے صدر نواز شریف کی خدمات اور منصوبوں پر مبنی ایک ڈاکومنٹری بھی پیش کی گئی۔
