اسپیشل انویسٹمنٹ فیسلٹیشن کونسل (ایس آئی ایف سی) کے تعاون سے ترکمانستان کو گوادر پورٹ تک رسائی مل گئی ہے، جو کہ سی پیک کے تحت ایک اہم پیشرفت ہے۔
یہ معاہدہ پاکستان اور ترکمانستان کے درمیان معاشی اور تجارتی روابط کو فروغ دینے کے لیے مفاہمتی یادداشت پر دستخط کرنے کی راہ ہموار کرے گا۔ اس کے نتیجے میں ترکمانستان سی پیک معاہدے کے تحت گوادر بندرگاہ تک رسائی حاصل کرنے والا پہلا وسطی ایشیائی ملک بن جائے گا۔
اس معاہدے کا مقصد دونوں ممالک کی بندرگاہوں کی صلاحیتوں کو بروئے کار لاتے ہوئے اشیا اور کنٹینرز کی آمدورفت میں علاقائی اور بین الاقوامی تعاون کو بڑھانا ہے۔ پاکستان اور ترکمانستان پہلے ہی مختلف منصوبوں پر کام کر رہے ہیں، جیسے تاپی پائپ لائن، ریلوے ٹریک، اور فائبر کنیکٹیویٹی، تاکہ جنوبی اور وسطی ایشیا کو ملایا جا سکے۔
حکومت نے اس معاہدے کے مسودے کی جانچ کے لیے ایک کمیٹی تشکیل دی ہے۔ اس کے علاوہ، گوادر بندرگاہ کی ترقی سے نہ صرف روزگار کے مواقع پیدا ہوں گے بلکہ یہ غیر ملکی سرمایہ کاری کو بھی راغب کرنے میں مددگار ثابت ہوگی۔
ایس آئی ایف سی کی کوششوں کے ذریعے گوادر کو عالمی تجارتی مرکز کے طور پر فروغ دینے کی کوششیں جاری ہیں، جس سے خطے میں معاشی استحکام اور ترقی کو فروغ ملے گا۔
