لاہور۔آئی سی سی چیمپیئنز ٹرافی کی اختتامی تقریب میں میزبان پاکستان کو نظر انداز کرنے پر پی سی بی حکام شدید برہم ہیں اور اس معاملے پر آئی سی سی سے وضاحت طلب کرنے کا ارادہ رکھتے ہیں۔
دبئی میں کھیلے گئے آئی سی سی چیمپیئنز ٹرافی کے فائنل کے بعد ٹرافی اور دیگر ایوارڈز دینے کی تقریب ہوئی، جس میں آئی سی سی کے چیئرمین جے شاہ، بھارتی کرکٹ بورڈ کے صدر راجربینی، سیکرٹری بی سی بی آئی اور نیوزی لینڈ کرکٹ بورڈ کے راجر ٹوز موجود تھے۔
تاہم، حیران کن طور پر آئی سی سی نے میزبان پاکستان کرکٹ بورڈ (پی سی بی) کے نمائندے کو اس تقریب میں مدعو نہیں کیا تھا۔ ذرائع کے مطابق، پی سی بی کے چیف آپریٹنگ آفیسر اور ٹورنامنٹ ڈائریکٹر سمیر احمد سید وہاں موجود تھے لیکن انہیں اس تقریب میں شامل نہیں کیا گیا۔
پی سی بی حکام اس معاملے پر آئی سی سی کو باقاعدہ خط لکھ کر وضاحت طلب کرنے کا ارادہ رکھتے ہیں تاکہ معلوم ہو سکے کہ میزبان بورڈ کو کیوں نظر انداز کیا گیا۔ پی سی بی سربراہ محسن نقوی نے آئی سی سی کو آگاہ کیا تھا کہ سمیر احمد سید فائنل میں پاکستان کی نمائندگی کریں گے۔
اختتامی تقریب میں اسٹیج پر کس کو مدعو کرنا ہے، اس کا فیصلہ آئی سی سی حکام کرتے ہیں، لیکن ماضی میں آئی سی سی ایونٹس میں ہمیشہ میزبان ملک کی نمائندگی اسٹیج پر کی جاتی رہی ہے۔ دبئی میں اس روایت کی خلاف ورزی پر پی سی بی حکام کے ساتھ ساتھ کرکٹ فینز بھی آئی سی سی کے رویے پر سخت ناراض ہیں۔
