اسلام آباد۔مقامی سطح پر قدرتی وسائل کی تلاش میں بڑی کامیابی حاصل ہوئی ہے، خیبر پختونخوا کے وزیرستان بلاک میں گیس اور تیل کے نئے ذخائر دریافت کر لیے گئے ہیں۔
ذرائع کے مطابق، سپنوام ون کنویں سے روزانہ 12.96 ملین کیوبک فٹ گیس اور 20 بیرل خام تیل حاصل ہونے کی توقع ہے۔ اس کنویں پر کھدائی کا آغاز 28 مئی 2024 کو کیا گیا تھا، اور یہ دریافت ماڑی انرجیز کی جانب سے کی گئی ہے۔
ماڑی انرجیز کے مطابق، کمپنی وزیرستان بلاک میں آپریٹر کی حیثیت سے کام کر رہی ہے اور اس کے پاس 55 فیصد شیئرز ہیں، جبکہ او جی ڈی سی ایل اور او پی آئی جوائنٹ ایڈونچر کا حصہ ہیں۔
کمپنی کا کہنا ہے کہ یہ دریافت ملک کے ہائیڈرو کاربن ذخائر میں اضافے کے لیے ایک اہم پیشرفت ثابت ہوگی۔ ماڑی انرجیز نے مزید ذخائر کی تلاش اور دریافت کے عزم کا اظہار کرتے ہوئے قومی سلامتی کے اداروں، وفاقی اور صوبائی حکومت کے تعاون کو سراہا ہے۔
